ရန်ကုန် ဩဂုတ် ၁၃
မကြာမီဖွင့်လှစ်တော့မည့် (၁၉) ကြိမ်မြောက်အောင်ဘာလေ ထီဖွင့်ပွဲမတိုင်မီ ယခုသြဂုတ်လလည်ပိုင်း မှစတင်ကာ ထီထိုးသူအရေအတွက်များပြားလာသည်နှင့်အညီ ထီတစ်စောင်ကျပ်(၁၃၀ဝ)ထိရှိနေကြောင်းနေရာအလိုက်ပြောင်းလဲမှုရှိကြောင်းထီရောင်းချသူများထံကသိရသည်။
" ထီက ကျွန်တော်တို့ အခု ကိုယ်စားလှယ်တစ်ဆင့်ရောင်းအနေနဲ့ဝယ်ကတာ ဆိုင်ကြီးတွေကနေဒီလ အတွက်ပေါ့ စဖွင့်တုန်းကတစ်စောင်ကို ကျပ် ၁၀၇၀/၁၀၈၀ ဝယ်ရတယ်။ နောက်ဈေးများထပ်ဆင်းမလားလို့ ဒီရက်ပိုင်းတွေမှာသွားဝယ်တော့ ကျပ် ၁၁၀ဝ / ၁၁၁၀/၁၁၂၀ နဲ့တစ်ခါဝယ်ရတယ်။ ဆိုင်ကြီးတွေရဲ့ကိုယ်စား လှယ်ရောင်းဈေးက တစ်ခုနဲ့တစ်ခုမတူသလို တစ်ရက်နဲ့တစ်ရက်လဲမတူကြဘူး။ ဈေးကအတက်ပဲရှိသလို ဖြစ်နေတယ်။ မြို့ထဲမှာဆိုလဲ မိုးယံက အများဆုံးဆိုတော့ မိုးယံရဲ့ထီဖွင့်ဈေးကိုနားထောင်ပြီး အောက်က ထီဆိုင်တွေကရောင်းကြတာ။ အခုရက်ပိုင်းမှာတောင် လက်လီလှည့်ရောင်းနေတာ တစ်စောင်ကို ကျပ် ၁၃၀ဝ အထိရောင်းနေရတယ်။ လကုန်ပိုင်းလောက်ဆိုရင်တော့ တစ်စောင်ကို ကျပ် ၁၄၀ဝ လောက်ထိဖြစ်မယ်လို့ထင်တယ်။ ကိုယ်စားလှယ်ဝယ်ဈေးကမြင့်တော့ နောက်ဆုံးထီးထိုးတဲ့သူနဲ့ကျွန်တော်တို့လက်လီရောင်းတဲ့သူတွေစကားတွေပြောရတာပေါ့။ ကျွန်တော်တို့လည်းအပြောအဆိုခံပြီးရောင်းနေရတာပါပဲ" ဟု ထီကိုယ်စားလှယ်ရောင်းဝယ်သူ ဦးကျော်လွင်ကပြောသည်။
လက်ရှိတွင် အောင်ဘာလေထီရုံးမှထုတ်ဝေသော ထီတစ်စောင်တန်ဖိုးသည် ကျပ် ၉၀ဝ ဝန်းကျင်ခန့်ရှိကြောင်းသိရသည်။ ပြီးခဲ့သည့်လတွင် အက္ခရာ အလုံးရေ ၃၉ လုံးထုတ်ဝေရာမှ ယခု သြဂုတ်လ (၁၉)ကြိမ်မြောက်ထီဖွင့်ပွဲအတွက် အက္ခရာ (၂) လုံးလျော့ကာ ၃၇ လုံးဖြင့်ထုတ်ဝေသွားမည်ဖြစ်ကြောင်းသိရသည်။
ထီအက္ခရာတစ်လုံးတွင် အစောင်ရေ ရှစ်သိန်းကိုးသောင်းကျော်ထုတ်ဝေသည့်အတွက် အက္ခရာနှစ်လုံးလျော့ထုတ်မည်ဖြစ်သောကြောင့် ထီအစောင်ရေ (၁၈)သိန်းနီးပါးလျော့ထုတ်ကာ ကျပ်သိန်း(၁၅၀ဝ၀)မှ ကျပ် ၅ သောင်းအထိ ထီဆုများပေါက်နိုင်ခြေယခင်ထက်များပြားလာမည်ဖြစ်ကြောင်း ထီအရောင်းအဝယ်အသိုင်းဝိုင်းမှ သိရသည်။ ယခုအခါ ထီအရောင်းအဝယ်လောကတွင် မိုးယံရွှေလမင်းနှင့်မြတ်ဆုကုဋေ ထိပ်သီး ကိုယ်စားလှယ်ဆိုင်ကြီးဖြစ်ပြီး ရွှေမြန်မာ၊ မဟာလာဘံကိုယ်စားလှယ်ဆိုင်ကြီးများမှဖွင့်သော ကိုယ်စားလှယ် ထီဖွင့်ဈေးအတိုင်း အခြားထီဆိုင်အသီးသီးမှ ဖွင့်ဈေးအနည်းအများအတိုင်း ရောင်းဝယ်ခြင်းဖြစ်ကြောင်း သိရသည်။
မင်းခ