အင်းစိန်မီးရထားခုံးကျော် မင်းကြီးလမ်းဘက်ခြမ်း တံတားသစ် သံပေါင်တပ်ဆင်လုပ်ငန်းများ ပြီးစီးလာ
ရန်ကုန် ဩဂုတ် ၁၃
ရန်ကုန်တိုင်းဒေသကြီး အင်းစိန်မြို့နယ်တွင်လက်ရှိအသုံးပြုလျက်ရှိသော ရထားလမ်းခုံးကျော်တံတားအမှတ်(၂)အင်းစိန်နှင့်ဆက်သွယ်ကာ မြန်မာ့မီးရထား(မြို့ပြ) အင်ဂျင်နီယာဌာန တံတားပေါင်အလုပ်ရုံ(မလွှကုန်း)မှ တာဝန်ယူဆောင်ရွက်နေသော ရထားလမ်းခုံးကျော်တံတားသစ်(မင်းကြီးလမ်းဘက်ခြမ်း) တည်ဆောက်ရေးစီမံကိန်းသည် လက်ရှိတွင်တံတားသံပေါင်တပ်ဆင်လုပ်ငန်းများပြီးစီးကာ လုပ်ငန်းပြီးစီးမှု ၈၅ ရာခိုင်နှုန်းခန့်ရှိပြီး လာမည့်စက်တင်ဘာလကုန်ပိုင်းအပြီးတည်ဆောက်ရန် အရှိန်အဟုန်မြှင့်ဆောင်ရွက်နေကြောင်း ထိုတံတားတည်ဆောက်ရေးစီမံကိန်းတာဝန်ခံရုံးမှ သိရသည်။
" ဒီခုံးကျော်တံတားတည်ဆောက်ခြင်းလုပ်ငန်းတွေက အခုအခြေအနေ မှာအလုံးစုံပြီးစီးမှုအနေနဲ့ဆိုရင် ၈၅ ရာခိုင်နှုန်း နီးပါးလောက်ပြီးလာပြီပေါ့။ ဒီကြားထဲမှာ ကိုဗစ်ကပ်ရောဂါကလည်းဖြစ်တော့ လုပ်ငန်းတွေ က အနည်းငယ်တော့နှောင့်နှေးကြန့်ကြာတာလေးတွေရှိတယ်။ ဒါပေမဲ့ လာမည့်စက်တင်ဘာလကုန်ပိုင်းကိုတော့ ပြီးစီးအောင် ဆောင်ရွက်ဖို့ ကြိုးပမ်းလုပ်ဆောင်နေပါတယ်။ တံတားတိုင်တွေပြီးလို့ တံတာပေါင်တွေ သံပေါင် တွေ၊PC Girder ပေါင်တွေတင်ပြီးသွားပြီး ထပ်မံပြီးတော့ ကြမ်းခင်းလောင်းကွန်ကရစ်ခင်းဖို့ဘဲကျန်တော့တယ်။ လုပ်ငန်းတွေကိုတော့ သွားလာရေးလဲအဆင်ပြေအောင်မထိခိုက်အောင် ညပိုင်းမှာဆောင်ရွက်မှာဖြစ်ပါတယ်"ဟု မြန်မာ့မီးရထား(မြို့ပြ)အင်ဂျင်နီယာဌာနတံတားပေါင်အလုပ်ရုံ(မလွှကုန်း) အင်ဂျင်နီယာ မှူးဦးမောင်ချိုက ပြောသည်။
ယခုအခါတွင် တင်ဒါအောင်မြင်သော A1 ဆောက်လုပ်ရေး ကုမ္ပဏီမှ တာဝန်ယူဆောင်ရွက်နေပြီး တံတားတိုင်လေးတိုင်တည်ဆောက်ခြင်း၊ တံတားသံပေါင်များတင်ခြင်း၊PC Girder များတင်ခြင်းလုပ်ငန်း ပြီးစီးနေပြီဖြစ်သည်။ P28၊P29၊AB (ချဉ်းကပ်)တိုင်များကို ကွန်ကရစ်တံတားပေါင်များတပ်ဆင်ခြင်းလုပ်ငန်း များ P26(A)၊P26(B)၊P27၊P28 တံတားတိုင်များကို Streel Box Girders များဖြင့် ဆက်သွယ်တပ်ဆင်ခြင်းလုပ်ငန်း များပြီးစီးနေပြီဖြစ်သည်။ ထိုမှတစ်ဆင့် ကွန်ကရစ် Slab လောင်းခြင်း/ကားလမ်းပြုလုပ်ခြင်း/လူသွားလမ်း ပလက်ဖောင်းနှင့် Hand Rail များတပ်ဆင်ခြင်း/ဆေးသုတ်ခြင်းနှင့်အချောသပ်လုပ်ငန်းများဆောင်ရွက်ခြင်း တို့ကို စက်တင်ဘာလကုန်ပိုင်းအပြီး ဆောင်ရွက်ရန်အဆင့်ဆင့်ပြုလုပ်သွားမည်ဖြစ်ကြောင်း သိရသည်။
ထိုအင်းစိန်ခုံးကျော်တံတားမင်းကြီးလမ်းဘက်ခြမ်း လက်တက်တံတားကိုပြီးခဲ့သည့် ဘဏ္ဍာရေးနှစ်(၂၀၁၈-၂၀၁၉)မှစတင်ကာ ယခုအချိန်ထိတည်ဆောက်နေခြင်းဖြစ်သည်။ ထိုတံတားလက်တက်သည်ယခင်အင်းစိန်မီးရထားခုံးကျော်တံတားကြီးကို ဆက်သွယ်ကာ ခုံးကျော်တံတားအဖြစ် ဗဟိုလမ်းကိုဖြတ်သန်းပြီး မင်းကြီးလမ်းအတိုင်း တံတားတိုင် P26(A)|P26(B)|P27|P28|P29|AB (ချဉ်းကပ်)တစ်ခုတို့ဖြင့် ဆက်စပ်ဖွဲ့စည်း တည်ဆောက်ခြင်းဖြစ်သည်။
စီမံကိန်းသည်အောက်ခံ Bord Pile Foundation ဖြစ်ကာ RC Girder နှင့် Steel Girder ပေါင်းပြီး ကွန်ကရစ်ကြမ်းခင်းတံတားဖြစ်ကြောင်း သိရသည်။ တံတားသည်အရှည် ၄၄၁ ပေနှင့် ချဉ်းကပ်တံတား အရှည်သည် ၁၂၃ ပေ ရှိသည်။ အကျယ်သည် ဘေးတစ်ဖက်တစ်ချက်လူသွားလမ်းပလက်ဖောင်းပါ၀င်ကာ ကား အဆင်းတစ်လမ်းသွား အကျယ် ၁၆ ပေ ရှိပြီး တံတားအမြင့်သည် ကားလမ်းအလွတ် အမြင့်ဆုံးနေရာ၌ ၁၈ ပေမြင့်သည်။ စီမံကိန်းကို ကျပ်သန်းပေါင်း ၁၉၁၀ သန်း အကုန်ကျခံ တည်ဆောက်ခြင်းဖြစ်ကြောင်း ထိုတံတားတည်ဆောက်ရေးစီမံကိန်းတာဝန်ခံရုံးမှ သိရသည်။
တံတားတည်ဆောက်ရေးတာဝန်ခံ အင်ဂျင်နီယာမှူးဦးမောင်ချိုက" ခရီးသွားပြည်သူတွေဟာ အင်းစိန်စျေး ဘက်ကနေလာပြီး အင်းစိန်ခုံးကျော်တံတားကြီးကနေ ဒီဘက်မင်းကြီးလမ်းကိုဆင်းလို့မရပါဘူး။ ဗဟိုလမ်းကိုတော့ ဆင်းလို့ရတယ်။ ကျွန်တော်တို့ အင်းစိန်စျေးကနေ မင်းကြီးလမ်းကိုလာချင်ရင် တံတား အတိုင်း အဆုံးထိလာပြီး အဲ့ကနေ နောက်ကြောင်းပြန်လှည့်ပြီးမှ တံတားဘေးကနေ မင်းကြီးလမ်းဘက်ကို ပြန်သွားရတာပါ။ ဒီအတွက်သွားလာတဲ့သူတွေဟာ ခရီးထောက်တာပေါ့။ အခုတော့ မင်းကြီးလမ်းဘက်ကို တံတားလက်တက်တည်ဆောက်နေပြီဆိုတော့ ပြီးစီးသွားရင် လှိုင်သာယာဘက်နဲ့ အင်းစိန်စျေးဘက်ကခရီးသွားတွေဟာ တံတားကြီးအတိုင်း မင်းကြီးလမ်းဘက်မှာရှိတဲ့ အင်းစိန်ဆေးရုံ|တရားရုံး|အင်းစိန်(GTI)စတဲ့နေရာတွေဘက်ကို လွယ်လွယ်ကူကူသွားလာလို့ရမှာဖြစ်ပါတယ်။ ဒီအတွက်လာမည့် သြဂုတ်လကုန်ပိုင်းပြီးစီး နိုင်ရေးကိုဆောင်ရွက်နေပါ တယ်" ဟု ပြောသည်။
ထိုအင်းစိန်ခုံးကျော်တံတား မင်းကြီးလမ်းဘက်ခြမ်းလက်တက်တံတားကို ပို့ဆောင်ရေးနှင့်ဆက်သွယ်ရေးဝန်ကြီးဌာန| မြန်မာ့မီးရထား(မြို့ပြ) အင်ဂျင်နီယာဌာန တံတားပေါင်အလုပ်ရုံ(မလွှကုန်း)၏ဘတ်ဂျက် ဖြင့်ဆောင်ရွက်ခြင်းဖြစ်ပြီး တင်ဒါအောင်မြင်သော A1 ဆောက်လုပ်ရေး ကုမ္ပဏီ မှ တည်ဆောက်နေခြင်းဖြစ်သည်။ Stell Box Girders များကို JNM ကုမ္ပဏီ မှထုတ်လုပ်ဆောင်ရွက်ကြောင်းထိုတံတားတည်ဆောက်ရေးစီမံကိန်းတာဝန်ခံရုံးမှ သိရသည်။
မင်းခ
