မိုင်းယောင်းမျှစ်ခါး အရသာကောင်းမွန်ခြင်းကြောင့် ဝယ်ယူသူများပြား

မိုင်းယောင်း ဧပြီ ၁၅ ရှမ်းပြည်နယ်အရှေ့ပိုင်း၊ တာချီလိတ်ခရိုင်၊ မိုင်းယောင်းမြို့နယ်တွင် မျှစ်ခါးများ လှိုင်လှိုင်ပေါ်၍ ဝယ်ယူသူ များပြားသဖြင့် မျှစ်ခါးရှာဖွေရောင်းချသူများ မိသားစုဝင်ငွေ အဆင်ပြေနေကြောင်း သိရသည်။ မျှစ်ခါးကို ဟင်းချိုရည်ချက်သောက်၍လည်းကောင်း၊ မီးဖုတ်/ပြုတ်ပြီးမှ တို့စရာအဖြစ်လည်းကောင်း၊ အသားများနှင့် ကြော်ချက်၍လည်းကောင်း အမျိုးမျိုးချက်ပြုတ် ပြုလုပ်နိုင်သော သဘာဝရိုးရာအစားအစာ တစ်မျိုးဖြစ်သည်။ မိုးဦးလေဦးများ တစ်ကြိမ်/နှစ်ကြိမ်ရွာပြီးက တောတောင်လျှိုမြောင်ထဲတွင် သဘာဝအတိုင်းပေါက်ရောက် နေသော မျှစ်ခါးပင်များမှ မျှစ်ခါးများ လှိုင်လှိုင်ပေါ်ကြောင်း၊ မျှစ်ခါး ငါးချောင်းပါ တစ်စည်းလျှင် ကျပ်တစ်ထောင်ရောင်းရကြောင်း သိရသည်။ မိုင်းယောင်းမျှစ်ခါးသည် အရသာကောင်းမွန်သဖြင့် ဒေသတွင်း လူကြိုက်များကာ မိုင်းဖြတ်၊ ကျိုင်းတုံ၊ တာချီလိတ်မြို့များသို့တစ်ဆင့် ဝယ်ယူရောင်းချသူများလည်း စီးပွားဖြစ် တွက်ခြေကိုက်ကြောင်း သိရသည်။ စိုင်းအောင်ဇော်လင်း (ပြန်/ဆက်)