လွိုင်ကော် ဇူလိုင် ၁၇
ကယားပြည်နယ်၊ လွိုင်ကော်မြို့နယ်၊ ကုန်းသာကျေးရွာအုပ်စု၊ ပီကင်းကောခူကျေးရွာတွင် အာဖရိက ဝက်အပြင်းဖျားရောဂါဖြစ်ပွား၍ ဝက်များအစုလိုက်၊ အပြုံလိုက်သေဆုံးမှုကြောင့် မယ်စဲ့မြို့နယ်အတွင်း အဆိုပါ ရောဂါမဖြစ်ပွားစေရေးဝက်မွေးမြူသူတောင်သူများမှ ပူးပေါင်းပါဝင်ရန် လိုအပ်ကြောင်းမြို့နယ်မွေးမြူရေးနှင့် ကုသရေးဦးစီးဌာနမှ သိရသည်။
အာဖရိကအပြင်းဖျားဝက်ရောဂါသည် အိမ်မွေးဝက်များနှင့် တောဝက်များတွင်အဖြစ်များပြီး ရောဂါ ကြိုတင်ကာကွယ်ဆေးနှင့်ကုသရန်ဆေးမရှိသည့်အတွက် ရောဂါဖြစ်ပွားပါကထိခိုက်ဆုံးရှုံးမှုများနိုင်သဖြင့် ကြိုတင်ကာကွယ်ရေးလုပ်ငန်းများ၊ ကူးစက်ရောဂါကာကွယ်ထိန်းချုပ်ခြင်းနှင့် ဇီဝမြှင့်တင်ရေးလုပ်ငန်းများကိုအထူးဂရုပြုဆောင်ရွက်စေလိုကြောင်း မြို့နယ်မွေးမြူရေးနှင့်ကုသရေးဦးစီးဌာနမှူးဒေါက်တာစောသေးရယ်က ပြောသည်။
ယခုအချိန်တွင် မယ်စဲ့မြို့နယ်အတွင်း၌ ဝက်အနည်းငယ်သေဆုံးခဲ့မှုကြောင့် မြို့နယ်မွေးမြူရေးနှင့် ကုသရေး ဦးစီးဌာနဦးစီးမှူးဒေါက်တာစောသေးရယ်နှင့် ဝန်ထမ်းများက ကျေးရွာအုပ်ချုပ်ရေးမှူးများနှင့် ပူးပေါင်း၍ အဖွဲ့နှစ်ဖွဲ့ခွဲကာ ဝမ်ကန်၊ နမ့်မန်းကျေးရွာတို့တွင် ဝက်မွေးမြူရေးခြံများအား ပိုးသတ်ဆေးဖျန်းပေးခြင်း၊ လက်ကမ်းစာစောင်ဖြန့်ဝေခြင်းနှင့် ဟိုဖကျေးရွာတွင် အခြေခံမွေးမြူရေးပညာပေးခြင်း၊ အာဖရိကအပြင်းဖျား ဝက်ရောဂါကာကွယ်ရေးအသိပညာပေးဟောပြောခြင်း၊ လက်ကမ်းစာစောင်ဖြန့်ဝေခြင်းနှင့် ပိုးသတ်ဆေးဖျန်း ခြင်းလုပ်ငန်းများကိုဇူလိုင်၁၆ရက်က ကွင်းဆင်းဆောင်ရွက်ခဲ့ကြောင်း သိရသည်။
ဝတ်ရည်(ပြန်/ဆက်)