ပွင့်ဖြူ ဇူလိုင် ၁၂
မကွေးတိုင်းဒေသကြီး၊ ပွင့်ဖြူမြို့နယ်၊ နန်းတော်ကျွန်းကျေးရွာအုပ်စု ထူးကျေးရွာတွင် ဇူလိုင် ၁၁ ရက်၊ နံနက် ၁ဝ နာရီက ဧရာဝတီမြစ်ကမ်းပါးပြိုကျမှုကြောင့် လူနေအိမ်ကိုးလုံးဘေးလွတ်ရာသို့ ကြိုတင် ပြောင်းရွှေ့ခဲ့ရကြောင်း ပွင့်ဖြူမြို့နယ်အထွေထွေ အုပ်ချုပ်ရေးဦးစီးဌာနရုံးမှ သိရသည်။
အဆိုပါ ဧရာဝတီမြစ်ကမ်းပါးပြိုကျမှုကြောင့် ပွင့်ဖြူမြို့နယ်၊ နန်းတော်ကျွန်းကျေးရွာအုပ်စု၊ ထူးကျေးရွာတွင် ၃ ပင် x ၄ ပင် သွပ်မိုး၊ ထရံကာ လူနေအိမ်နှစ်လုံးနှင့် ၃ ပင် x ၃ ပင် သွပ်မိုး၊ ထရံကာ လူနေအိမ်ခုနစ်လုံး စုစုပေါင်းလူနေအိမ်ကိုးလုံးကို မြစ်ကမ်းပါးနှင့် အလွန်နီးကပ်လာသည့်အတွက် ဒေသခံပြည်သူများ အန္တရာယ်ကင်းဝေးစေရန် ဘေးလွတ်ရာသို့ ကြိုတင်ပြောင်းရွှေ့ခဲ့ကြောင်းသိရပြီး လူနေအိမ်များပြောင်းရွှေ့ရာတွင် မြို့နယ်အထွေထွေအုပ်ချုပ်ရေးဦးစီးဌာန၏ ဦးဆောင်မှုဖြင့် ဒေသခံပြည်သူ များက ဝိုင်းဝန်းကူညီရွှေ့ပြောင်းပေးခဲ့ကြကြောင်း သိရသည်။ အဆိုပါ ဧရာဝတီမြစ်ကမ်းပါးပြိုကျမှုကြောင့် အခြားလူနှင့်တိရစ္ဆာန် ထိခိုက်မှုမရှိကြောင်း သိရသည်။
ကျော်ဆန်းမြင့်(ပြန်/ဆက်)