မင်းလှမြို့နယ်အတွင်း တရားမဝင်သစ်များ သိမ်းဆည်းရမိ
မင်းလှ ဇူလိုင် ၁၂
မကွေးတိုင်းဒေသကြီး၊ သရက်ခရိုင်၊ မင်းလှမြို့နယ်၊ မြို့သစ်ကျေးရွာအုပ်စု မြောက်မျှားကုန်း ကျေးရွာအနီးတွင် တရားမဝင်သစ်လုံးများနှင့်သစ်ခွဲသားများ သိမ်းဆည်းရမိခဲ့ကြောင်း သိရသည်။
ဖြစ်စဉ်မှာ ဇူလိုင် ၁၁ ရက်၊ ညနေ ၅ နာရီခွဲက မင်းလှမြို့နယ် သစ်တောဦးစီးဌာနမှ မြို့နယ်ဦးစီးမှူးဦးခင်မောင်စိုးလင်းနှင့်ဝန်ထမ်းများ၊ လက်ပံတံခါးရဲကင်းစခန်းမှူး ဒုရဲအုပ်သက်နိုင်ဦးနှင့်တပ်ဖွဲ့ဝင်များ၊ မြောက်မျှားကုန်းကျေးရွာ ရွာခွဲတာဝန်ခံဦးတင်ဌေးနှင့်အဖွဲ့ဝင် များပူးပေါင်းအဖွဲ့သည် လက်ပံတံခါးနယ်မြေ အတွင်း တရားမဝင်သစ်များဖမ်းဆီးရေး ကွင်းဆင်းစစ်ဆေးဆောင်ရွက်ရာမှ မြောက်မျှားကုန်းကျေးရွာ၏ အနောက်မြောက်ဘက် နှစ်မိုင်ခန့်အကွာ တောအတွင်း၌ အခြားသစ်ခွဲသားဆိုက်စုံ အချောင်း ၃ဝ၊ ၂ ဒသမ ၆၃၉၄ တန်၊ လုံးပတ်သုံးပေခန့်ရှိ အခြားသားသစ်လုံးဆိုက်စုံ ၁၅ လုံး၊ သုည ဒသမ ၉၂ဝ တန် သိမ်းဆည်းရမိသဖြင့် သစ်ပိုင်ရှင်ကို စုံစမ်းဖော်ထုတ်အရေးယူမည်ဖြစ်ကြောင်း မင်းလှမြို့နယ်ရဲတပ်ဖွဲ့မှူးရုံး မှသိရသည်။
ကျော်ဆန်းမြင့်(ပြန်/ဆက်)
