အွန်လိုင်းမှတစ်ဆင့် မဲစာရင်းကြည့်ရှုနိုင်မည့် Mobile Application စီစဉ်ဆောင်ရွက်
ရန်ကုန် ဇွန် ၁၃
၂၀၂၀ ပြည့်နှစ် ပြည်ထောင်စုအထွေထွေရွေးကောက်ပွဲအတွက် မဲစာရင်းများထုတ်ပြန်ရာတွင်အွန်လိုင်းမှ တစ်ဆင့် မဲစာရင်းကြည့်ရှုနိုင်မည့် Mobile Application တစ်ခုအား အသုံးပြုနိုင်စေရန် ပြည်ထောင်စုရွေးကောက် ပွဲကော်မရှင်မှ စီစဉ်ဆောင်ရွက်လျက်ရှိကြောင်း သိရသည်။
ပြည်တွင်း၌ ကိုရိုနာဗိုင်းရပ်စ်ရောဂါ(COVID-19) ကူးစက်ပြန့်ပွားမှု ကြိုတင်ကာကွယ်သည့်အနေဖြင့် သက်ဆိုင်ရာမှ မဲစာရင်းများ ထုတ်ပြန်ကြေညာသောအခါ လူများစုဝေးခြင်းများကို တတ်နိုင်သမျှ ရှောင်ရှား နိုင်ရေးအတွက် ယခုကဲ့သို့ Mobile Application တစ်ခုကို အသုံးပြုရန် စီစဉ်ရခြင်းဖြစ်ကြောင်း ပြည်ထောင် စုရွေးကောက်ပွဲကော်မရှင်မှ တာဝန်ရှိသူတစ်ဦးက ပြောသည်။
လာမည့် ပြည်ထောင်စုအထွေထွေရွေးကောက်ပွဲ ကျင်းပမည့်အချိန်သည် ကိုရိုနာဗိုင်းရပ်စ်ရောဂါ (COVID-19)ကူးစက်ကာလနှင့် တိုက်ဆိုင်နေသည့်အတွက် ရွေးကောက်ပွဲလုပ်ငန်းစဉ်များကိုဆောင်ရွက်ရာတွင် သက်ဆိုင်ရာမှ ထုတ်ပြန်ထားသော COVID-19 ကာကွယ်ထိန်းချုပ်ရေးဆိုင်ရာညွှန်ကြားချက်များနှင့်အညီ ဂရုတစိုက်စီစဉ်ဆောင်ရွက်သွားမည်ဖြစ်ကြောင်း သိရသည်။
ထို့အပြင် ပြည်သူများ မဲပေးသည့်နေ့တွင်လည်းမဲရုံများနှင့် ဆန္ဒမဲလာပေးသူများ မှတစ်ဆင့် ကိုရိုနာဗိုင်းရပ်စ်ရောဂါ ကူးစက်ပြန့်ပွားမှုများ မဖြစ်ပေါ် စေရန်အတွက် COVID-19 ကာကွယ်ထိန်းချုပ်ရေးဆိုင်ရာလမ်းညွှန်ချက်များနှင့်အညီ သရုပ်ပြမဲပေးခြင်းများကိုလည်းပြုလုပ်သွားမည်ဖြစ်ကြောင်း သိရသည်။
ယခုအခါ ပြည်တွင်း၌ ကိုရိုနာဗိုင်းရပ်စ်ရောဂါ(COVID-19)ကူးစက်ပြန့်ပွားမှုအခြေအနေများကြောင့် ၂၀၂၀ ပြည့်နှစ် ပြည်ထောင်စုအထွေထွေရွေးကောက်ပွဲကို ရွှေ့ဆိုင်းပေးရန်နိုင်ငံရေးပါတီအချို့က တောင်းဆို ထားကြကြောင်း သိရသည်။
(ဆောင်းဦး)
