ကြေးတိုင်အင်းများအတွင်း ငါးမျိုးစိုက်ထည့်ပွဲ ကျင်းပ

ဘိုကလေး ဩဂုတ် ၁၈

ငါးရိက္ခာ ဖူလုံမှုရှိစေရေး၊ ငါးသယံဇာတ ပေါများ ကြွယ်ဝစေရေးနှင့် အင်းများအတွင်း ငါးထုတ်လုပ်မှု တိုးတက်စေရေးအတွက် ကြေးတိုင် အင်းသားကြီးများက ယမန်နေ့က  ဧရာဝတီတိုင်းဒေသကြီး၊ ဘိုကလေးမြို့နယ် ငါးလုပ်ငန်း ဦးစီးဌာနနှင့်  ပူးပေါင်းကာ ဘိုကလေးမြစ်ရေပြင်၊ ဘိုကလေး-ရန်ကုန်-မော်ကျွန်း သုံးဂွဆိုင် မြစ်ဝနှင့် ကြေးတိုင်အင်းများအတွင်းသို့  ငါးမျိုးစိုက်ထည့်ခြင်း အခမ်း အနားကို ကျင်းပသည်။

အဆိုပါ အခမ်းအနားသို့ ဖျာပုံခရိုင် ငါးလုပ်ငန်းဦးစီးဌာနမှူး ဦးကိုကိုလွင်၊ ဘိုကလေးမြို့နယ် စီမံအုပ်ချုပ်ရေးအဖွဲ့၊ ဥက္ကဌဦးကံဝင်း နှင့်အဖွဲ့ဝင်များ၊ မြို့နယ်ဌာနဆိုင်ရာအကြီးအကဲများ၊ နှစ် ရှည်အငှား ဂရမ်(ကြေးတိုင်) စိစစ်ရေး ကော်မတီအဖွဲ့၊ လူမှုရေး အသင်းအဖွဲ့ များ၊ မြို့နယ်ငါးလုပ်ငန်းဦးစီးဌာန ဝန်ထမ်းများနှင့်ကြေးတိုင်အင်း သားကြီးများ ၊ စုစုပေါင်း အင်အား ၇၀ ဦး ခန့် တက်ရောက်ကြပြီး သုံးလက်မအရွယ် ငါးတန်ငါးမျိုး ကောင်ရေ ၇၅၀,၆၈၀ ကောင်ကို စိုက်ထည့်ကြောင်း သိရသည်။

မိုးစက်(ဘိုကလေး)