ကိုဗစ်-၁၉ ကာလအတွင်း ဝင်ငွေနည်း အိမ်ထောင်စုများကို စားသောက်ကုန်များ လှူဒါန်း
ရန်ကုန်၊ အောက်တိုဘာ ၆
ရန်ကုန်တိုင်းဒေသကြီး၊ မြောက်ပိုင်းခရိုင်၊ လှည်းကူးမြို့နယ် ရှမ်းရွာကျေးရွာ၌ အခြေပြုဖွင့်လှစ်ထားသည့် အဖြူရောင်ကြယ်တစ်ပွင့် ပရဟိတအသင်းက မင်္ဂလာဒုံမြို့နယ် ပုလဲမြို့သစ်ရှိ ကိုဗစ်-၁၉ ကာလအတွင်း ပုံမှန်ဝင်ငွေမရှိသည့် အခြေခံလူတန်းစား အိမ်ထောင်စု များကို အောက်တိုဘာ ၅ ရက်၊ နံနက် ၁၀ နာရီက စားသောက်ကုန် များ သွားရောက်ပေးအပ် လှူဒါန်းခဲ့ကြောင်းသိရသည်။
ထိုသို့လှူဒါန်းရာတွင် စားဝတ်နေရေးအခက်အခဲရှိသည့် အိမ်ထောင်စု ၅၃ စုစာကို အိမ်ထောင်စု တစ်စုလျှင် ဆန် ၂ ပြည် တစ်အိတ်၊ ကြက်ဥ ၁၀ လုံး၊ ကြက်သွန်နီ ၁ ထုပ်၊ ခေါက်ဆွဲခြောက်အထုပ်များ နှင့် ဆပ်ပြာထုပ်များကို ပရဟိတအသင်း တာဝန်ရှိသူများက အမှန်တကယ် လိုအပ်လျက်ရှိသော ပြည်သူများလက်ဝယ်အရောက် ထောက်ပံ့လှူဒါန်းခဲ့ကြခြင်းဖြစ်သည်။
အဆိုပါ ထောက်ပံ့လှူဒါန်းရာတွင် စေတနာရှင်ပြည်သူများက အသင်းသို့ လာရောက်လှူဒါန်းပေးမှုများကို ကိုဗစ်-၁၉ ရောဂါဖြစ်ပွား နေသည့်ကာလအတွင်း ဝင်ငွေနည်းပါးသည့် အခြေခံလူတန်းစား အိမ်ထောင်စုများကိုတစ်ဆင့် ပြန်လည်လှူဒါန်းပေးခဲ့ခြင်း ဖြစ်ကြောင်း အဖြူရောင်ကြယ်တစ်ပွင့် ပရဟိတအသင်း တာဝန်ရှိသူများထံမှ သိရသည်။ ကျော်ကျော်(ပြန်/ဆက်)
