ရန်ကုန် စက်တင်ဘာ ၂၉
ရန်ကုန်တိုင်းဒေသကြီး၊ မြောက်ပိုင်းခရိုင် တိုက်ကြီးမြို့နယ် အတွင်းရှိ ကိုဗစ် - ၁၉ ရောဂါကြောင့် အောက်ဆီဂျင်လိုအပ်နေသူများ၊ အခြားရောဂါဝေဒနာကြောင့် အောက်ဆီဂျင်လိုအပ်နေသူများအတွက် အောက်ဆီဂျင် အချိန်တိုအတွင်း အလွယ်တကူလုံလောက်စွာရရှိစေ ရေးရည်ရွယ်၍ မြို့မိမြို့ဖများနှင့် စေတနာရှင်ပြည်သူများ စုပေါင်း လှူဒါန်းမှုဖြင့် တည်ဆောက်ထားသည့် အောက်ဆီဂျင်စက်ရုံသည် စက်တင်ဘာ ၂၈ ရက် ညနေ ၃ နာရီခန့်က စတင်လည်ပတ်ခဲ့ကြောင်း သိရသည်။
တိုက်ကြီးမြို့နယ် အင်္ဂလားရပ်ကွက်ရှိ မြို့မိမြို့ဖ ဦးမျိုးမြင့်၏ ဆန်စက်မြေနေရာဘေးတွင် ယာယီတည်ဆောက်ထားသောတရုတ် နိုင်ငံထုတ် အောက်ဆီဂျင်စက်ရုံစတင်လည်ပတ်ချိန်တွင် အောက်ဆီဂျင် ပါဝင်မှုနှုန်း ၉၃ ဒသမ ၅ ရာခိုင်နှုန်းရှိပြီး တစ်နာရီလျှင် အောက်ဆီဂျင် ၄၀ လီတာအိုး ၆ အိုးအထိ တစ်ပြိုင်တည်း ထုတ်လုပ်နိုင်မည်ဖြစ်ရာ တစ်ရက်လျှင် ပျမ်းမျှအောက်ဆီဂျင် ၄၀ လီတာအိုး ၁၂၀ အိုး ထုတ်လုပ်နိုင်မည်ဖြစ်ကြောင်း သိရသည်။
အဆိုပါ အောက်ဆီဂျင်စက်ရုံ စတင်လည်ပတ်မှုအခြေအနေကို မြို့နယ် စီမံအုပ်ချုပ်ရေး အဖွဲ့ ဥက္ကဋ္ဌ ဦးအောင်ကျော်စိုး၊ အဖွဲ့ဝင် ( ၁) ဗိုလ်မှူး ရဲမင်းအောင် ၊ အဖွဲ့ဝင် ( ၂) ဦးမောင်မောင်လတ်တို့ပါဝင်သော အဖွဲ့နှင့် မြို့မိမြို့ဖများလာရောက်ကြည့်ရှု၍ လိုအပ်သည်များကို ညှိနှိုင်း ဆောင်ရွက်ပေးခဲ့ကြောင်း သိရသည်။
စန်းကလျာခိုင်၊ ဇွဲထက်ကို