ရန်ကုန်-မန္တလေး အမြန်လမ်း၌ လက်နက်/ခဲယမ်းများဖမ်းဆီးရမိ
နေပြည်တော်၊ ဇူလိုင် ၅
ဇွန် ၂၆ ရက်တွင် ရန်ကုန် - မန္တလေး အမြန်လမ်း၊ မိုင်တိုင်အမှတ်(၁၃၅) အနီး၌ လက်နက်/ခဲယမ်းများ သယ် ဆောင်လာသူ ကျော်ဇောဟိန်း၊ (၁၉)ရပ်ကွက်၊ ဒဂုံမြို့သစ် (တောင်ပိုင်း)မြို့နယ်နေသူနှင့် သိန်းသန်းမိုး၊ (၂၁)ရပ်ကွက်၊ ဒဂုံမြို့သစ်(တောင်ပိုင်း)မြို့နယ်နေသူတို့နှစ်ဦးကို ပရိုဘောက် အမျိုးအစား တက္ကစီယာဉ်ပေါ်မှ AK-47 လေး လက်၊ M-16 နှစ် လက်၊ Glock အမျိုးအစား ၉ မမ ပစ္စတို နှစ်လက်၊ စုစုပေါင်း လက်နက်ငယ်မျိုးစုံရှစ်လက်၊ ကျည်အိမ် ငါးခု၊ MG 2 အီနာဂါဗုံးသီး ၁၀ လုံး၊ ၅ ဒသမ ၅၆ ကျည် ၃၁၃ တောင့်တို့နှင့်အတူ ဖမ်းဆီးရမိခဲ့သည်။
တရားခံများ၏ ထွက်ဆိုချက်အရ ဇွန် ၂၇ ရက်တွင် ဆက်စပ်တရားခံ ဟန်မောင်မောင်ချို(ခ) ပေါင်ပေါင်ကို ပခုက္ကူမြို့နယ်၊ မြိုင်သာယာကွက်သစ် ရှိ သနပ်ခါးခြံအတွင်း၌ ထပ်မံဖမ်းဆီး ရမိခဲ့သည်။
ဖမ်းဆီးရမိ တရားခံများ၏ ထွက် ဆိုချက်များအရ လက်နက်/ခဲယမ်း များကို မြဝတီမြို့တွင် နေထိုင်သော နေမျိုးမှတစ်ဆင့် KNDO အဖွဲ့မှ ချိတ် ဆက်ဝယ်ယူခဲ့ကြောင်း သိရသည်။
ဆွေဦး
