မန္တလေးမြို့တွင် လျှပ်စစ်အပူလွန်ကဲရာမှ မီးလောင်မှုများဖြစ်ပွား
မန္တလေး မေ ၁၇
မန္တလေးခရိုင်၊ ပြည်ကြီးတံခွန်မြို့နယ် ၇၃ လမ်းနှင့် ၇၄ လမ်းကြား၊ မင်္ဂလာလမ်းနှင့်မင်းကြီးရန်နောင် လမ်းကြား၊ ငွေတော်ကျီကုန်းရပ်ကွက်ရှိ ဦးထွန်းနိုင်ပိုင်ဆိုင်သော ပေ ၂၀ x ပေ ၄၀သွပ်မိုး၊ ပျဉ်းခင်းနံကပ် ၂ ထပ်တွင် မေ ၁၆ ရက်၊ နံနက် ၇ နာရီ ၄၅ မိနစ်က ဆီကြိတ်စက်ရုံရှိမီးအားမြှင့်စက်အပူလွန်ကဲရာမှ အနီးရှိ သစ်သားတန်းသို့ကူးစက်ပြီး မီးလောင်မှုဖြစ်ပွားရာ ပေ ၂၀ x ပေ ၄၀ သွပ်မိုး၊ ပျဉ်ခင်း၊ နံရံကပ် ၂ ထပ် ၁ လုံး နှင့် အတွင်းပစ္စည်းများစုစုပေါင်း ကျပ် ၁၅၀ဝ၀ဝ၀ ခန့်ဆုံးရှုံးခဲ့သည်။
မီးလောင်ရာသို့ မန္တလေးတိုင်းဒေသကြီး၊ မီးသတ်ဦးစီးမှူးဦးသန်းဇော်ဦး ဦးဆောင်သော မီးငြှိမ်းသတ် ယာဉ် ၂၂ စီး၊ ရေသယ်ယာဉ် ၈ စီး၊ အုပ်ချုပ်မှုယာဉ် ၃ စီး၊ သန္ဓေမီးသတ်တပ်ဖွဲ့ဝင် ၆၀ ဦး၊ ဒေသအရန်မီးသတ် တပ်ဖွဲ့ဝင် ၉၀ ဦးဖြင့် ဝိုင်းဝန်းငြှိမ်းသတ်ရာ နံနက် ၁၁ နာရီ မိနစ် ၃၀ တွင် မီးငြိမ်းသွားသည်။ မီးလောင်မှုနှင့် ပတ်သက်၍ မန်နေဂျာဦးအောင်ကျော်ညွန့်အား ပြည်ကြီးတံခွန်မြို့မရဲစခန်းက (ပ)၂၉၅/၂၀၂၀၊ ပုဒ်မ၂၈၅ ဖြင့် အမှုဖွင့်စစ်ဆေးလျက်ရှိသည်။
အလားတူ မန္တလေးမြို့မဟာအောင်မြေမြို့နယ်၊ မဟာအောင်မြေအနောက်ရပ်ကွက်အကွက် (၅၂၅) ၃၉ လမ်းနှင့် ၈၅ လမ်းထောင့် အိမ်ငှားဦးမင်းအောင်၏ ၁၅ ပေ x ပေ ၂၀ အာစီ ၄ ထပ်သင်ထောက်ကူ ပစ္စည်း အရောင်းဆိုင်တွင် မေ ၁၆ ရက်၊ ည ၉ နာရီ မိနစ် ၄၀ က Extension ဝါယာကြိုးအပူလွန်ကဲပြီး အနီးရှိ ဆေးဝါးပစ္စည်းများထည့်ထားသော ဂျပ်ဖာမှတစ်ဆင့် ကူးစက်ပြီး မီးလောင်မှုဖြစ်ပွားရာ ၁၅ ပေ x ပေ ၂၀ အာစီ ပထမထပ် ၁ ထပ်၊ ကလစ်စတင်းအလှဆီပစ္စည်းများအပါအဝင် ကျပ် ၃၀ဝ၀ဝ၀ဝ ဆုံးရှုံးခဲ့သည်။
မီးလောင်ရာသို့ မန္တလေးခရိုင်မီးသတ်ဦးစီးမှူး ဦးထက်အောင်ဦးဆောင်သော သန္ဓေမီးသတ်တပ်ဖွဲ့ဝင် ၆၀ ဦး၊ ဒေသအရန်မီးသတ်တပ်ဖွဲ့ဝင် ၁၀ဝ ဦး စုစုပေါင်းမီးငြှိမ်းသတ်ယာဉ် ၂၅ စီး မီးသတ်ရေသယ်ယာဉ် ၁၂ စီး၊ အထပ်မြင့်မီးသတ်ယာဉ် ၇ စီးဖြင့် ဝိုင်းဝန်းငြှိမ်းသတ်ရာ ည ၈ နာရီ ၁၅ မိနစ်တွင် မီးငြိမ်းသွားသည်။
မီးငြှိမ်းသတ်စဉ် ဟေမမာလာတောင်ဒေသအရန်မီးသတ်တပ်ဖွဲ့မှ တပ်ကြပ်ရန်နိုင်ရှင်းမှာ မီးခိုးမွန်း၍ အသက်ရှူကြပ်သဖြင့် မန္တလေးဆေးရုံကြီးသို့ ဆေးကုသမှုခံယူခဲ့သည်။ မီးလောင်မှုနှင့်ပတ်သက်၍ အမှတ်(၇) ရဲစခန်းက အိမ်ငှားဦးမင်းအောင်အား (ပ)၂၅၃/၂၀၂၀၊ပုဒ်မ၂၈၅အရ အမှုဖွင့်အရေးယူထားသည်။
မောင်ပြည်သူ(မန္တလေး)
