သိန္နီမြို့နယ်၊ တနိုင်းမြို့နယ်နှင့် ရွှေကူမြို့နယ်တို့တွင် မူးယစ်ဆေးဝါးများ ဖမ်းဆီးရမိ
သိန္နီ မေ ၁၆
မေ ၁၅ ရက်၊ နံနက် ၁၁ နာရီအချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ ပါဝင်သောပူးပေါင်းအဖွဲ့သည် ရှမ်းပြည်နယ်၊ သိန္နီမြို့နယ်၊ မူဆယ်-မန္တလေးသွား ကားလမ်း၊ ကောင်းဟော်ကျေးရွာ အနီးတွင် မောင်ရွှေ(ခ)အားဟွာ မောင်းနှင်ပြီး မမာထုလိုက်ပါလာသည့် WISH အမျိုးအစား အဖြူရောင် မော်တော်ယာဉ်ကို ရပ်တန့်ရှာဖွေရာ မော်တော်ယာဉ်နောက်ဖုံး အတွင်းမှ အဖြူရောင်ကော်ပုံးများဖြင့် ထည့်လျက် အက်စစ်တစ်အင်ဟိုက်ဒြိုက် ၃၄၀ လီတာ၊ မြန်မာငွေ ၁၀၀,၀၀၀ ကျပ်နှင့် လက်ကိုင်ဖုန်း ၂ လုံးတို့ကို သိမ်းဆည်းရမိခဲ့သဖြင့် မောင်ရွှေ(ခ) အားဟွာ(၄၃)နှစ်၊ မမာထု(၃၂)နှစ် တို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားကြောင်း သိရသည်။
အလားတူ မေ ၁၅ ရက်၊ နံနက် ၇ နာရီ ၄၅ မိနစ်အချိန်၌ တနိုင်းမြို့မရဲစခန်းမှ တပ်ဖွဲ့ဝင်များ ပါဝင်သည့် ပူးပေါင်းအဖွဲ့သည် တနိုင်းမြို့နယ်၊ မိုင်းခွန်အပေါက်ဝကျေးရွာနေ အောင်ကိုကိုဇင် (၂၉)နှစ်၏ ယာယီတဲအား ဝင်ရောက်ရှာဖွေရာ ၎င်းနှင့်အတူ ညိုဇင်အောင်(၃၃)နှစ်တို့ ၂ ဦးအား ဘိန်းဖြူ ၄ ဒသမ ၂ ဂရမ်နှင့်အတူ ဖမ်းဆီးရမိခဲ့သဖြင့် အောင်ကိုကိုဇင်ပါ အမျိုးသား ၂ ဦး (ဖမ်းမိ)အား မူးယစ်ဆေးဝါးနှင့် စိတ်ကိုပြောင်းလဲစေတတ်သောဆေးဝါးများဆိုင်ရာဥပဒေအရ စစ်ဆေးအရေးယူလျက်ရှိကြောင်း သိရသည်။
အလားတူ မေ ၁၅ ရက်၊ နံနက် ၇ နာရီခွဲအချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ ပါဝင်သောပူးပေါင်းအဖွဲ့သည် ရွှေကူမြို့နယ်၊ ဆိပ်သာကျေးရွာအုပ်စု၊ တောင်ချောင်းကျေးရွာအနီး အောင်နိုင်ဝင်း ၏ လယ်တဲကိုရှာဖွေရာ ခြံဝင်းအတွင်းမှ စိတ်ကြွရူးသွပ်ဆေးပြား ၁,၃၃၀ ပြား သိမ်းဆည်းရမိခဲ့သဖြင့် အောင်နိုင်ဝင်း(၄၆)နှစ်အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားကြောင်း သိရသည်။
ဆွေဦး
