သမီးနှစ်ယောက်မွေးနေ့အမှတ်တရ စာကြည့်ဆောက်လုပ်လှူဒါန်းပေးခဲ့သည့် အဆိုတော်လင်းလင်းနှင့်ချစ်သုဝေ

ရန်ကုန် ဇန်နဝါရီ ၂၃

အဆိုတော်လင်းလင်းက သမီးနှစ်ယောက်မွေးနေ့အမှတ်တရကုသိုလ်အဖြစ် စာကြည့်တိုက်များ လှူဒါန်းသွားမည် ဖြစ်ကြောင်းကို  ယင်း၏လူမှုကွန်ရက်စာမျက်နှာမှတစ်ဆင့် ပြောပြထားသည်။ အဆိုတော်လင်းလင်းနှင့် ချစ်သုဝေတို့၏ အမြွှာသမီးလေးများဖြစ်ကြသည့် ခေတ်နှင့်သစ်တို့ ညီအစ်မက ယခုဇန်နဝါရီ ၁၉ ရက်တွင် အသက် ၄ နှစ်ပြည့်သွားခဲ့ကြပြီဖြစ်သည်။ သမီးနှစ်ယောက်မွေးနေ့ရောက်တိုင်း အဆိုတော်လင်းလင်းတို့ ဇနီးမောင်နှံက အလှူအတန်းများ ပြုလုပ်ပေးနေလျက်ရှိပြီး ယခုအသက် ၄နှစ် ပြည့်မွေးနေ့အလှူအဖြစ် စာကြည့်တိုက်ဆောက်လုပ်လှူဒါန်းသွားမည်ဖြစ်ကြောင်း " ဖြစ်ချင်နေတဲ့ဆန္ဒပြည့်ဖို့ ကြိုးစားပေးတဲ့ CLEAN YANGON ရဲ့ခေါင်းဆောင်ကို ဇေယျာရေ ကျေးဇူးပါ။ နိုင်ငံရဲ့ကျေးလတ်ဒေသတွေမှာ သမီးလေးတွေမွေးနေ့တိုင်း တစ်နှစ်တစ်ခါ စာကြည့်တိုက်လှူဖို့ ကြိုးစားနေတာတော့ကြာပါပြီ။ ယခု ၄ နှစ် ပြည့်မွေးနေ့ကစပြီး အကောင်အထည်ဖော်မယ့် စိတ်ကူးပေါ့။ ဒီနေ့မနက်မှ နေရာလေးတစ်ခု အတည်ပြု ရွေးချယ်ဖြစ်တယ်။ မန္တလေးတိုင်း ပုဂံမြို့သစ်အနောက်ဘက်ကမ်းက ကျွန်းရွာလေးမှာ စာကြည့်တိုက် လေးကို မကြာခင်ဆောက်ပါမယ်။ သမီးတွေမွေးနေ့တိုင်း တစ်နှစ်တစ်ခါ စာကြည့်တိုက်လှူနိုင်ဖို့လည်း ကြိုးစားပြင်ဆင်သွားမယ်" ဟုဆိုပြီး  ယင်း၏ဖေ့စ်ဘွတ်တွင် ရေးသားဖော်ပြခဲ့ခြင်းဖြစ်သည်။

အဆိုတော်လင်းလင်းနှင့် ချစ်သုဝေတို့က သမီးနှစ်ယောက်၏အမည်ဖြင့်လည်း  “ ခေတ်သစ် ဖောင်ဒေးရှင်း”  ကို ၂၀၁၉ ခုနှစ် ဖေဖော်ဝါရီ ၁၉ ရက်က စတင်တည်ထောင်ခဲ့ပြီး အဆိုပါဖောင်ဒေးရှင်းမှတစ်ဆင့် မွေးရာပါနှလုံးအားနည်းသည့်ရောဂါ၊ နှလုံးဆန်ခါပေါက်ပါသည့်  ရင်သွေးငယ်များ၏ ကျန်းမာရေးကို ခွဲစိတ်ကုသပေးလျှက်ရှိသည့်အပြင် စာကြည့်တိုက် အလှူများလည်း စတင်လှူဒါန်းနေပြီ ဖြစ်သည်။ (HWY)