တိုင်းဒေသကြီးစည်ပင်သာယာနယ်နိမိတ်အတွင်း ‌Mobile ဈေးကားများဖြင့် လှည့်လည်ရောင်းချလျက်ရှိ

ရန်ကုန် နိုဝင်ဘာလ ၃၀ 

ရန်ကုန်တိုင်းဒေသကြီးအစိုးရဖွဲ့၏ လမ်းညွှန်မှုအရ ရန်ကုန်မြို့တော်စည်ပင်သာယာရေးကော်မတီ၊ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်နှင့် ညီနောင်အသင်းလုပ်ငန်းရှင်များမှ ပူးပေါင်းစီစဉ်ဆောင်ရွက်သော မြို့နယ်လှည့် ဈေးကား ရောင်းချခြင်းကို ရန်ကုန်မြို့တော်စည်ပင်သာယာနယ်နိမိတ်တွင် စက်တင်ဘာလ ၂၆ ရက်နေ့တွင် စတင်ရောင်းချလျက်ရှိပြီး တိုင်းဒေသကြီးစည်ပင်သာယာနယ်နိမိတ်အတွင်းကိုလည်း နိုဝင်ဘာလ ၄ ရက်နေ့မှ စတင်ရောင်းချပေးလျက်ရှိကြောင်း သိရသည်။

ယခုအခါ ဒီဇင်ဘာလအတွင်း၌လည်း ၁-၁၂-၂၀၂၀ ရက်နေ့တွင် ခရမ်းမြို့၌ လည်းကောင်း၊ ၂-၁၂-၂၀၂၀ ရက်နေ့တွင် သန်လျင်မြို့၌လည်းကောင်း၊ ၃-၁၂-၂၀၂၀ ရက်နေ့တွင် မှော်ဘီမြို့၌လည်းကောင်း၊ ၄-၁၂-၂၀၂၀ ရက်နေ့တွင် ထန်းတပင်မြို့၌ လည်းကောင်း ဆက်လက်ရောင်းချပေးသွားမည် ဖြစ်ကြောင်း သိရသည်။

ဆက်လက်၍ ၅-၁၂-၂၀၂၀ ရက်နေ့မှ    ၇-၁၂-၂၀၂၀ ရက်နေ့အထိ ခေတ္တရပ်နားထားမည်ဖြစ်ပြီး ၈-၁၂-၂၀၂၀ ရက်နေ့တွင် သုံးခွမြို့၌လည်းကောင်း၊ ၉-၁၂-၂၀၂၀ရက်နေ့တွင် ကွမ်းခြံကုန်းမြို့၌ လည်းကောင်း ပြန်လည်ရောင်းချပေးသွားမည်ဖြစ်ကြောင်း သိရသည်။ မြို့နယ်များရှိ စားသုံးသူပြည်သူများအနေဖြင့် မြို့နယ်လှည့် ဈေးကားရောင်းချခြင်းကို အထူးကြိုက်နှစ်သက်သည့်အပြင် စဉ်ဆက်မပြတ် ရောင်းချပေးသွားရန် တောင်းဆိုလျက်ရှိကြောင်း သိရှိရသည်။

သွင်မောင်မောင်