အောက်တိုဘာ ၁၄
ရုရှားနိုင်ငံ၊ စိန့်ပီတာစဘတ်မြို့၌ ကျင်းပမည့် စိန့်ပီတာစဘတ်အိုးပင်း တင်းနစ်ပြိုင်ပွဲမှ ဂရိတင်းနစ် ကစားသမား စတီဖာနို့စ်နုတ်ထွက်ခဲ့ကြောင်း သိရသည်။
အဆိုပါ တင်းနစ်ပြိုင်ပွဲတွင် ပါဝင်ယှဉ်ပြိုင်ရန် စာရင်းပေးသွင်းထားသည့် စတီဖာနို့စ်သည် ဒဏ်ရာပြဿနာ ရှိနေသည့်အတွက် ပြိုင်ပွဲဝင်မည့်စာရင်းမှ နုတ်ထွက်ခဲ့ခြင်းဖြစ်သည်။
စတီဖာနို့စ်သည် ပြင်သစ်အိုးပင်း တင်းနစ်ပြိုင်ပွဲ ဆီမီးဖိုင်နယ်ပွဲစဉ်အဖြစ် ကမ္ဘာ့အဆင့် ၁ ကစားသမား ဂျိုကိုဗစ်နှင့် ယှဉ်ပြိုင်ကစားခဲ့ရာ ယင်းပွဲစဉ်တွင် ဒဏ်ရာရရှိခဲ့ခြင်းဖြစ်ပြီး စိန့်ပီတာစဘတ်အိုးပင်း တင်းနစ် ပြိုင်ပွဲတွင် ပါဝင်ယှဉ်ပြိုင်ရန် လိုအပ်သည့် ဆေးကုသမှုများပြုလုပ်ခဲ့သော်လည်း ဒဏ်ရာမှာသက်သာလာခြင်း မရှိသောကြောင့် ပြိုင်ပွဲမှနုတ်ထွက်ရန်ဆုံးဖြတ်ခဲ့ခြင်းဖြစ်သည်။
စတီဖာနို့စ်သည် စိန့်ပီတာစဘတ်အိုးပင်း တင်းနစ်ပြိုင်ပွဲနှင့်လွဲချော်ခဲ့သော်လည်း ဗီယင်နာ၌ ကျင်းပမည့် ပြိုင်ပွဲအတွက် ပြင်ဆင်နေပြီး ယင်းပြိုင်ပွဲတွင် ပါဝင်ကစားနိုင်ရန် ပစ်မှတ်ထားနေကြောင်း သိရသည်။
(သူရိန်)