စစ်ကိုင်းတိုင်းဒေသကြီး၊ မွန်ပြည်နယ်နှင့် ကရင်ပြည်နယ်တို့တွင် ပမာဏများပြားသော မူးယစ်ဆေးဝါးများ ဖမ်းဆီးရမိပြီး ပစ်ခတ်ဖမ်းဆီးရသည့် အခြေအနေများရှိခဲ့

နေပြည်တော် စက်တင်ဘာ ၁၃

 စက်တင်ဘာ ၁၁ ရက်၊ ၁၁ နာရီအချိန် မွန်ပြည်နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ သံဖြူဇရပ်မြို့နယ်၊ ရေး-သံဖြူဇရပ်ကားလမ်း၊ သက္ကောကျေးရွာ အနီးတွင် Hohda Fit အမျိုးအစားမော်တော်ယာဉ်အား စစ်ဆေးရန် တားဆီးရပ်တန့်ခိုင်းစဉ် မောင်းနှင်ထွက်ပြေးသောကြောင့် သေနတ်ဖြင့်ပစ်ခတ်တားဆီးရာ ယာဉ်ဘီးများကျည်ဆံထိမှန်ပြီး ရပ်တန့်သွားသဖြင့် စစ်ဆေးရာ ခန့်ဇော်ကို၊ ရဲထက်လွင်နှင့် ညီမွန်ဦးတို့ ၃ ဦးအား အိုက်စ် ၉ ကီလို၊ စိတ်ကြွရူးသွပ် ဆေးပြား ၄,၈၄၀ ပြား(တန်ဖိုးငွေကျပ် ၃၈၄၂ သိန်း)တို့နှင့်အတူ ဖမ်းဆီးရမိခဲ့ကြောင်း၊ စစ်ဆေးဖော်ထုတ်ချက်အရ ၎င်းတို့မူးယစ်ဆေးဝါး စတင်ယူဆောင်ခဲ့သည့် ကရင်ပြည်နယ်၊ ဘုရားသုံးဆူမြို့၊ အမှတ်(၃)ရပ်ကွက်၊ ရတနာသိင်္ခလမ်းနေ အေးဝင်းနိုင်(ခ)ဝတုတ်၏ နေအိမ်ကို ၎င်းနေ့ညနေပိုင်းတွင် ရှာဖွေရာ အိမ်အတွင်းရှိ မြေအောက်ခန်းအတွင်းမှ စိတ်ကြွရူးသွပ်ဆေးပြား ၉၄၃,၄၀၀ ပြား၊ ဘိန်းဖြူ ၁၀၈ ဒသမ ၁၅ ကီလိုခန့်၊ ကတ်တမင်း ၁ ကီလို၊ စိတ်ကြွရူးသွပ်ဆေးပြားအကြေမှုန့် ၀ ဒသမ ၄၅ ကီလို (တန်ဖိုးငွေကျပ် ၁၀၀,၈၅၅ သိန်း)ကို ထပ်မံသိမ်းဆည်းရမိခဲ့ကြောင်း၊ ကွင်းဆက်အရ ဖမ်းဆီးရမိသည့် မူးယစ်ဆေးဝါးများမှာ ဩဂုတ် ၁၉ ရက်က ဝေါလေမြို့၊ ဝေါလေ-မြဝတီသွားကားလမ်း၊ သဲဖြူ ချောင်းကျေးရွာအနီးတွင် အိုက်စ် ၁၅၉၈ ကီလို၊ ဘိန်းဖြူ ၁၃၇ ဒသမ ၆၅၅ ကီလိုနှင့် မော်လမြိုင်မြို့၌ စိတ်ကြွရူးသွပ်ဆေးပြား ၅၈၀၀၀ ပြား ဖမ်းဆီးရမိခဲ့သည့် မြဝတီမြို့မရဲစခန်း၊ မယ(ပ)၁၁၁/၂၀၂၀ မူးစိတ်ပုဒ်မ ၁၉(က)/ ၂၁ အမှုမှ ဖမ်းမိမူးယစ်ဆေးဝါးပိုင်ရှင် အောင်ကျော်လတ်(ခ)မောင်လတ်မှ ထိုင်းငွေ ၁၃၀၀၀ဝ ဘတ်ပေး၍ ၎င်း၏နေအိမ်တွင် သိမ်းဆည်းခိုင်းထားသော ပစ္စည်းများဖြစ်ကြောင်း စစ်ဆေးပေါ်ပေါက်သဖြင့် ခန့်ဇော်ကို(ခ)ခန့်ကို(ခ)ဘယ်ကျော်၊ ရဲထက်လွင်၊ ညီမွန်ဦး(ခ)ညီညီ၊ အေးဝင်းနိုင်(ခ)ဝတုတ်၊ အောင်ကျော်လတ်(ခ)မောင်လတ် တို့အားလည်းကောင်း၊

အလားတူ စက်တင်ဘာလ ၁၁ ရက်နေ့ ည ၁၀ နာရီ အချိန်ခန့်တွင်  မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် စစ်ကိုင်းတိုင်းဒေသကြီး၊ ပင်လည်ဘူးမြို့နယ်၊ ပင်လည်ဘူး-ဖောင်းပြင်သွားလမ်း၊ ဝါးဘိုးချောင်းရွာအနီးတွင် သတင်းအရ ဇင်မင်းထွေး မောင်းနှင်ပြီး အိုက်လောင် လိုက်ပါလာသည့် HINO DUTRO VAN အမျိုးအစား ကွန်တိန်နာယာဉ်အား ရပ်တန့်စစ်ဆေးရှာဖွေရာ ၎င်းမော်တော်ယာဉ်ကြမ်းခင်း အံဝှက်အတွင်းမှ ဘိန်းဖြူ ၉ ဒသမ ၄၅ ကီလို(တန်ဖိုးငွေကျပ် ၇,၅၆၀ သိန်း)သိမ်းဆည်းရမိခဲ့ပြီး စိစစ်ချက်အရ ၎င်းတို့မူးယစ်ဆေးဝါးများ စတင်ယူဆောင်လာသည့် သီပေါမြို့နယ်၊ စံလောင်းကျေးရွာရှိ သီဟအား ဆက်လက်ဖမ်းဆီးရမိခဲ့သဖြင့် ဇင်မင်းထွေး၊ အိုက်လောင်နှင့် သီဟတို့အား လည်းကောင်း၊ 

အလားတူ စက်တင်ဘာလ ၁၂ ရက်၊ နံနက် ၄ နာရီအချိန် စစ်ကိုင်းတိုင်းဒေသကြီး၊ ဖောင်းပြင်မြို့နယ် ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ စစ်ကိုင်းတိုင်း ဒေသကြီး၊ ဖောင်းပြင်မြို့နယ်၊ ဖောင်းပြင်-ဗန်းမောက်ကားလမ်း၊ မြောက်လွင်ကျေးရွာအနီးတွင် အမျိုးသားတစ်ဦး မောင်းနှင်လာသည့် CYGNUS အမျိုးအစား မော်တော်ယာဉ်အား စစ်ဆေးရန် ရပ်တန့်ခိုင်းစဉ် လမ်းပိတ်ဆို့ရပ်ထားသည့် စစ်ဆေးရေးအဖွဲ့၏ ဆိုင်ကယ် ၃ စီးအား ယာဉ်ဖြင့် တိုက်ကာမောင်းနှင်ထွက်ပြေးသဖြင့် ပစ်ခတ်ဖမ်းဆီးရာ မော်တော်ယာဉ်၏ နောက်ဘီးများအား ကျည်ဆံထိမှန်ပြီး တစ်ဖာလုံခန့်အကွာ လမ်း၏ယာဘက်ဘေးသို့ ယာဉ်ထိုးကျတိမ်းမှောက် သွားခဲ့ကြောင်း၊ ယာဉ်မောင်းမှာ ခုန်ချထွက်ပြေးတိမ်းရှောင်သွားပြီး မော်တော်ယာဉ်နောက်ခန်းအတွင်းရှိ ဆာလာအိတ်များအတွင်းမှ ဘိန်းဖြူ ၉ ဒသမ ၅၇ ကီလို(တန်ဖိုးငွေကျပ် ၉၅၇၀ သိန်း)သိမ်းဆည်းရမိခဲ့သဖြင့် မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်းနှင့် ကွင်းဆက် တရားခံများဖော်ထုတ်လျက်ရှိကြောင်း သိရသည်။

ဆွေဦး