ရန်ကုန်တိုင်းဒေသကြီးရဲတပ်ဖွဲ့နယ်မြေအတွင်း လက်နက်ကိုင်ဆောင်သူများ ဖမ်းဆီးအရေးယူ
ရန်ကုန် စက်တင်ဘာ ၁၁
ရန်ကုန်တိုင်းဒေသကြီးရဲတပ်ဖွဲ့နယ်မြေအတွင်း တရားဥပဒေစိုးမိုးရေးနှင့် ပြည်သူလူထု၏ အသက် အိုးအိမ်စည်းစိမ်ကို ထိခိုက်စေမည့် မှုခင်းများမဖြစ်ပွားစေရေးအတွက် သက်ဆိုင်ရာနယ်မြေအလိုက် ဖမ်းဆီး ခြင်းဆောင်ရွက်ခဲ့ရာ စက်တင်ဘာ ၁၀ ရက်၊ နံနက် ၂ နာရီအချိန်တွင် ဒဂုံမြို့သစ်(တောင်ပိုင်း)မြို့နယ်ရဲတပ်ဖွဲ့မှတပ်ဖွဲ့ဝင်များသည် (၇၀)ရပ်ကွက်၊ လှော်ကားလမ်းနှင့် အနော်ရထာလမ်းထောင့်၌ ရာဇာထံမှ အရိုးအသွား(၈)လက်မခန့်ရှိ ထိပ်ဦးချွန်ဓားတစ်ချောင်းကိုလည်းကောင်း၊
လှိုင်သာယာ(အနောက်ပိုင်း)မြို့နယ်ရဲတပ်ဖွဲ့မှတပ်ဖွဲ့ဝင်များသည် ညနေ ၃ နာရီ ၅၅ မိနစ်အချိန်တွင် (၁၀)ရပ်ကွက်၊ အနော်ရထာလမ်းမကြီးပေါ်၌ တင်ထက်သူ ထံမှ အသွား(၉)လက်မခွဲခန့်ရှိ ထိပ်ဦးချွန်ဓားတစ်ချောင်း၊ ညနေ ၆ နာရီခွဲအချိန်တွင် ကျုံစုကျေးရွာ၊ မြသီရိလမ်းမကြီးပေါ်၌ သက်ပိုင်ထွေးထံမှ အသွား(၇)လက်မခန့်ရှိ ထိပ်ဦးချွန် စကေဘာတစ်ချောင်း၊ ည ၉ နာရီခွဲအချိန်တွင် (၁၆)ရပ်ကွက်၊ ဇေယျာသီရိ(၅)လမ်းမပေါ်၌ လှမြင့် ထံမှ အရိုးအသွား(၁၀)လက်မခန့်ရှိ ထိပ်ဦးချွန်ဓါးတစ်ချောင်းနှင့် (၂၀)ရပ်ကွက်၊ ဗိုလ်တေဇလမ်းမပေါ်၌ ဉာဏ်လင်းထံမှ အရိုးအသွား (၁၂)လက်မခန့်ရှိ ထိပ်ဦးချွန်ဓားတစ်ချောင်းကိုလည်းကောင်း သိမ်းဆည်းရမိ၍ သက်ဆိုင်ရာရဲစခန်းအသီးသီးတွင် အမှုဖွင့်အရေးယူခဲ့ကြောင်း သိရသည်။
ဆွေဦး
