အာဆင်နယ်ခံစစ်ကစားသမား ဘယ်လာရင်ကို ခေါ်ယူရန် ဂျူဗင်တပ်အသင်း ပစ်မှတ်ထား
ဩဂုတ် ၂၉
အာဆင်နယ်အသင်း ခံစစ်ကစားသမား ဘယ်လာရင်ကိုခေါ်ယူရန် ဂျူဗင်တပ်အသင်း နည်းပြ ပီယာလိုက ပစ်မှတ်ထားနေကြောင်း သိရသည်။
ဘယ်လာရင်သည် ပြီးခဲ့သည့်ဘောလုံးရာသီက တံကောက်ကြောဒဏ်ရာကြောင့် အာဆင်နယ်အသင်း၏ ပွဲစဉ်အများစုကိုပါဝင်နိုင်ခြင်းမရှိဘဲ လာမည့်ဘောလုံးရာသီတွင်လည်း ယင်းအနေဖြင့် အသင်းတွင် ပွဲထွက် ကစားသမားနေရာအတွက် ခက်ခဲဖွယ်ရှိနေသည်။
အာဆင်နယ်အသင်းသည် ခံစစ်နေရာတွင် လူအင်အားထပ်မံဖြည့်တင်းသည့်အနေဖြင့် ဆောက်သမ်တန် အသင်းမှ ဆီဒရစ်ကို အငှားစာချုပ်ဖြင့်ခေါ်ယူထားသော်လည်း ကာလရှည်စာချုပ်သစ် ထပ်မံချုပ်ဆိုခဲ့ခြင်း ကြောင့် ဘယ်လာရင်အနေဖြင့် ပွဲထွက်ခွင့်ရရန် ရုန်းကန်ရဖွယ်ရှိနေသည်။
ဂျူဗင်တပ်အသင်း နည်းပြ ပီယာလိုသည် ဘယ်လာရင်ကိုခေါ်ယူနိုင်ရန် အာဆင်နယ်အသင်းနည်းပြ အာတီတာနှင့်ဆက်သွယ်မှုပြုလုပ်နေကြောင်း သတင်းများထွက်ပေါ်နေပြီး ယင်းကို ပီအက်စ်ဂျီအသင်းက လည်း စိတ်ဝင်စားနေကြောင်း သိရသည်။
(သူရိန်)
