ရန်ကုန် သြဂုတ် ၂၈
နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးနှင့် ကျန်တိုင်းဒေသကြီးနှင့် ပြည်နယ်စာတိုက်ကြီးများတွင် ဩဂုတ် ၂၈ ရက် နံနက် ရုံးချိန် ၉ နာရီခွဲမှ စတင်ပြီး မြန်မာ့စာတိုက်လုပ်ငန်း မှသုခုမအနုပညာပန်းဆယ်မျိုးတွင် အပါအဝင်ဖြစ်သော ပန်းတဉ်းအထိမ်းအမှတ်အထူးထုတ်စာပို့တံဆိပ်ခေါင်းသစ် ၂၀ဝ ကျပ်တန်ကို နိုင်ငံနှင့်တစ်ဝန်းတွင် တံဆိပ်ခေါင်းအလုံးရေ သုံးသိန်း ထုတ်ဝေပြီး ပထမနေ့ စာအိတ် (Firstday Cover) ပေါင်း ၃၄၀ဝ စတင်ဖြန့်ချိ ထုတ်ဝေပြီဖြစ်ကြောင်း ရန်ကုန်စာတိုက်ကြီး လက်ထောက် အထွေထွေမန်နေဂျာ ရုံးမှသိရသည်။
"ဒီနေ့အသစ်ထုတ်ဝေတဲ့ပန်းတဉ်းအထိမ်းအမှတ် အထူးထုတ်စာပို့တံဆိပ်ခေါင်းသစ်က မြန်မာ့ရိုးရာ သုခုမအနုပညာ ပန်းဆယ်မျိုး တတိယမြောက်တစ်မျိုးအပါအဝင်ဖြစ်ပါတယ်။ ဒါကို မြန်မာ့ယဉ်ကျေးမှု အနုပညာရပ်များကို နောင်လာမဲ့မျိုးဆက်သစ် လူငယ်လူရွယ်လေးတွေအကြားမှာ ပိုမိုသိရှိပြီးအလေးထားနိုင်ဖို့အဓိကရည်ရွယ်တာပါ။ အထူးတံဆိပ်ခေါင်းတွေက မြန်မာနိုင်ငံရဲ့နေ့ထူးနေ့မြတ်တွေမှာ ထုတ်ပါတယ်။ ပြာသိုလကနေစပြီး (၁၂)လရာသီပွဲတော်နှင့်ပန်းများ အထိမ်းအမှတ်တံဆိပ်ခေါင်းကိုထုတ်ခဲ့တယ် "ဟု ရန်ကုန်စာတိုက်ကြီး လက်ထောက်အထွေထွေမန်နေဂျာ ဒေါ်စီစီဟန် ကပြောသည်။
ထိုစာပို့တံဆိပ်ခေါင်းစတင်ထုတ်ဝေဖြန့်ချိ သည့် ပထမနေ့ ဩဂုတ် ၂၈ ရက် နံနက်ပိုင်းတွင် အထူးအစီအစဉ်အနေဖြင့် ရန်ကုန်စာတိုက်ကြီးတွင် ပန်းတဉ်းအထိမ်းအမှတ်အထူးထုတ်စာပို့တံဆိပ်ခေါင်းသစ် (၂၀ဝ) ကျပ် တန်စာပို့ တံဆိပ်ခေါင်းများနှင့် ပထမနေ့စာအိတ် (Firstday Cover) များပေါ် တွင် နေ့စွဲအမှတ်အသားတံဆိပ်များအား လာရောက်ဝယ်ယူသူများကို စာတိုက်ဝန်ထမ်းများက ရိုက်နှိပ်ပေးကြောင်းသိရသည်။ အလားတူ နေပြည်တော် ဗဟိုစာတိုက်ကြီးနှင့်မန္တလေးစာတိုက်ကြီးတို့တွင်လည်း ပထမနေ့စာအိတ် (Firstday Cover)များပေါ်တွင် နေ့စွဲအမှတ်အသားတံဆိပ်ရိုက်နှိပ်ပေးကြောင်း သိရသည်။
ထို မြန်မာ့ရိုးရာပန်း ၁၀ မျိုးအနက် ပန်းတဉ်းတံဆိပ်ခေါင်း မတိုင်မီက ပန်းပဲ၊ ပန်းတိမ်တို့ကို ထုတ်ဝေခဲ့ပြီး ဖြစ်ကြောင်း၊ ပန်းတဉ်းပညာရပ်သည်ကြေးနီ၊ ကြေးဝါဖြင့်ကြေးထည်ပစ္စည်းများပြုလုပ်သော ပညာရပ်ဖြစ် ကြောင်း၊ အထူးသဖြင့် ဗုဒ္ဓဘာသာသာသနာတော်ဆိုင်ရာ ရုပ်တုတော်များ၊ ခေါင်းလောင်း၊ ကြေးစည်တူရိယာစသည့်ပစ္စည်းများကို ပန်းတဉ်းပညာရပ်ဖြင့်ပြုလုပ်ခြင်းဖြစ်ကြောင်း သိရသည်။
မြန်မာနိုင်ငံတွင် တံဆိပ်ခေါင်းများကို ငွေနှင့်တန်ဖိုးတူညီသော စာပို့ခ/ မှတ်ပုံတင်ခ အနေဖြင့်ထုတ်ဝေ အသုံးပြုကြသည်။ ထို့ပြင် တံဆိပ်ခေါင်းစုဆောင်းသူဝါသနာရှင်များအနေဖြင့်လည်း တံဆိပ်ခေါင်းအသစ်စတင်ထုတ်ဝေရောင်းချပြီဆိုလျှင် စာတိုက်ကြီးများတွင် လာရောက်ဝယ်ယူစုဆောင်းကြကြောင်း ရန်ကုန်စာတိုက်ကြီး လက်ထောက်အထွေထွေမန်နေဂျာရုံးမှ သိရသည်။
မင်းခ