အင်းတော်မြို့နယ်တွင် ငွေကျပ် ၂.၃၉၄ ဘီလီယံတန်ဖိုးရှိ စိတ်ကြွရူးသွပ်ဆေးပြားများနှင့် ကျိုင်းတုံမြို့နယ်တွင် ငွေကျပ်သိန်း ၇,၂၀၀ ကျော်တန်ဖိုးရှိ မူးယစ်ဆေးဝါးများ ဖမ်းဆီးရမိ
အင်းတော် ဩဂုတ် ၂၄
ဩဂုတ် ၂၃ ရက်၊ ညနေ ၅ နာရီခွဲအချိန် အင်းတော်မြို့မရဲစခန်းမှ တပ်ဖွဲ့ဝင်များသည် အင်းတော်မြို့နယ်၊ နဘားပူးပေါင်းစစ်ဆေးရေးဂိတ်တွင် သိန်းသား မောင်းနှင်ပြီး ဂွန်းအောင်လိုက်ပါလာသည့် SUZUKI အမျိုး အစားမော်တော်ယာဉ်အားရပ်တန့်ရှာဖွေရာ ယာဉ်အတွင်းမှ စိတ်ကြွရူးသွပ်ဆေးပြား ၄၇၈,၈၀၀ ပြား၊ မြန်မာငွေ ၈၀,၀၀၀ ကျပ်၊ လက်ကိုင်ဖုန်း(၂)လုံးတို့ကို သိမ်းဆည်းရမိခဲ့သဖြင့် သိန်းသား(၂၃)နှစ်၊ ဂွန်းအောင်(၂၂)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သိရသည်။
ဩဂုတ် ၂၃ ရက်၊ မွန်းတည့် ၁၂ နာရီအချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များသည် ကျိုင်းတုံမြို့နယ်၊ ကျိုင်းတုံ-မိုင်းခတ်သွားကားလမ်း၊ ဝမ်တာပုံပူးပေါင်းစစ်ဆေးရေး ဂိတ်တွင် မိုင်းခတ်မြို့မှ ကျိုင်းတုံမြို့သို့ စိုင်းမြအောင် မောင်းနှင်ပြီး မနန်းနမ်(ခ)နန်းနစ်နှင့် အိုက်နွန်းတို့လိုက်ပါလာသည့် IPSUM အမျိုးအစားမော်တော်ယာဉ်အားရပ်တန့်ရှာဖွေရာ ယာဉ်အတွင်းမှ အိုက်စ် ၄၀ ကီလို၊ လက်ကိုင်ဖုန်း ၃ လုံးတို့ကို သိမ်းဆည်းရမိခဲ့ပြီး စစ်ဆေးချက်အရ ညနေ ၅ နာရီအချိန်တွင် မိုင်းယန်းမြို့နယ်၊ ယန်းခိုင်ကျေးရွာရှိ အိုက်နွန်း၏နေအိမ်ကို ဆက်လက်ရှာဖွေရာ နေအိမ်အတွင်းမှ ဆေးခြောက် ၀ ဒသမ ၃၅ ကီလို ထပ်မံသိမ်းဆည်း ရမိခဲ့သဖြင့် စိုင်းမြအောင်(၃၁)နှစ်၊ မနန်းနမ်(ခ) နန်းနစ်(၃၁)နှစ်၊ အိုက်နွန်း(၁၈)နှစ်တို့အား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။
ဆွေဦး
