ဒလမြို့ ဆာပါချောင် ကျောင်းစုရပ်ကွက် စိတ္တသုခလမ်းရှိ နေအိမ်တစ်ခုအတွင်းမှ မူးယစ်ဆေးဝါးများ သိမ်းဆည်းရမိ

ရန်ကုန် သြဂုတ် ၂၁

ရန်ကုန်တိုင်းဒေသကြီး တောင်ပိုင်းခရိုင်၊ ဒလမြို့နယ်၊ ဒလမြို့မရဲတပ်ဖွဲ့စခန်းမှ ရဲအုပ်အောင်ကျော်၊   အမျိုးသမီး ဒုရဲအုပ်ဇွန်မီကို၊ ရဲတပ်ကြပ်ကြီးမင်းဇော်ဦး၊ ရဲတပ်ကြပ်သန်းစိန်၊ ရဲဒုတပ်ကြပ် ရန်အောင်၊ ဝင်းမောင်မောင်၊ လှဆွေ၊ ချစ်ဦးတို့နှင့်အတူ အသိသက်သေများပါဝင်ကြလျက် သြဂုတ် ၂၀ ရက်နေ့ည ၇ နာရီအချိန်ခန့်က ဆာပါချောင်ကျောင်းစုရပ်ကွက်၊စိတ္တသုခလမ်းရှိ မခင်သန္တာ၏နေအိမ်၌ မူးယစ်ဆေးဝါးရောင်းချနေကြောင်း သတင်းအရနေအိမ်တွင်း ဝင်ရောက်ရှာဖွေရာ နေအိမ်အိပ်ခန်းတွင်း ကြမ်းပြင်ပေါ်ရှိ ပန်းရောင်ပလတ်စတစ်ခွက်အတွင်းမှ အပြာရောင်ကပ်ခွာ ပလတ်စတစ်အိတ်ဖြင့် ထည့်ထားသည့် စိတ်ကြွရူးသွပ်ဆေးပြားဟုယူဆရသော WY စာတန်းပါပန်းရောင်ဆေးပြား ၁၄၂ ပြား၊ အစိမ်းရောင်ဆေးပြား ၄ ပြား စုစုပေါင်းဆေးပြား ၁၄၆ ပြား၊  ၁၄ ဒသမ ၆ ဂရမ်၊  ပလတ်စတစ်အကြည်ဖြင့် ထည့်ထားသည့် မူးယစ်ဆေးဝါးဆေးခြောက်ဟုယူဆရသော စိမ်းညိုရောင်အရိုးအရွက်အစေ့ရောရာ တစ်ထုပ်လျှင် အလေးချိန်  ၂ ဂရမ် ခန့်စီပါ ၂၅ ထုပ် ၅၀ ဂရမ်ခန့်၊ အနက်ရောင်ကြွပ်ကြွပ်အိတ်ဖြင့်ထည့်ထားသော မူးယစ်ဆေးဝါးဆေးခြောက်ဟုယူဆရသော စိမ်းညိုရောင်အရိုးအရွက်အစေ့ရောရာ ၇၅ ဂရမ်ခန့်ရှိ အထုပ်တစ်ထုပ်နှင့်အတူ မူးယစ်ဆေးဝါးရောင်းချရရှိ​ငွေရောရာ ၁၀၇၆၀၀ ကျပ်နှင့် ပလတ်စတစ်အကြည်အိတ် အသေး ၅၀ ခုတို့ကို တွေ့ရှိသိမ်းဆည်းရမိသဖြင့် ယင်းမခင်သန္တာထွန်း(၃၅)နှစ်(ဘ)ဦးဉာဏ်ထွန်းဆိုသူကို ဒလမြို့မရဲစခန်းမှ၊ မယ(ပ)၃၃/၂၀၂၀၊ မူးယစ်ဆေးဝါးနှင့်စိတ်ကိုပြောင်းလဲစေတတ်သော ဥပဒေပုဒ်မ၁၉(က)/ ၂၀(က)ဖြင့် အမှုဖွင့်ထားရှိပြီး ဒုရဲအုပ်အောင်သူရမှ အမှုစစ်ဖြစ်ဆောင်ရွက်ကာ အမြန်ဆုံးတရားစွဲတင်ပို့နိုင်ရေး စီစဉ်ဆောင်ထားကြောင်း သိရသည်။

အံ့ကြီးမောင်(ဒလ)