တောင်ကြီး ဩဂုတ် ၁၈
ဩဂုတ် ၁၇ ရက်၊ နံနက် ၁ နာရီခွဲအချိန် တောင်ကြီးမြို့မရဲစခန်းမှ တပ်ဖွဲ့ဝင်များသည် ရှမ်းပြည်နယ်၊ တောင်ကြီးမြို့၊ မြို့မရပ်ကွက်၊ ဗိုလ်ချုပ်ပန်းခြံအနီးတွင် ပြည့်ဖြိုးဦး မောင်းနှင်ပြီး ကျော်သူဟိန်း(ခ)ပိုးယား လိုက်ပါလာသော Mark II အမျိုးအစားမော်တော်ယာဉ်ကို ရပ်တန့်ရှာဖွေရာ ယာဉ်အတွင်းမှ စိတ်ကြွရူးသွပ် ဆေးပြား ၂,၀၃၂ ပြား သိမ်းဆည်းရမိခဲ့သဖြင့် ပြည့်ဖြိုးဦး(၃၂)နှစ်၊ ကျော်သူဟိန်း(ခ)ပိုးယား(၃၃)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သိရသည်။
အလားတူ ဩဂုတ် ၁၆ ရက်၊ ညနေ ၃ နာရီခွဲအချိန် ဘုတ်ပြင်းမြို့မရဲစခန်းမှ တပ်ဖွဲ့ဝင်များသည် တနင်္သာရီတိုင်းဒေသကြီး၊ ဘုတ်ပြင်းမြို့နယ်၊ အလယ်မန်ကျေးရွာအုပ်စု၊ အလယ်မန်ကျေးရွာလမ်းပေါ်တွင် မသင်္ကာဖွယ်တွေ့ရှိသူ အောင်နိုင်ဝင်း(ခ) မတ်ဟူရှင်(ခ)မတ်ရှင်နှင့် အောင်နိုင်တူး(ခ)မန်ဂျားလာ တို့အားရှာဖွေရာ အောင်နိုင်တူး(ခ)မန်ဂျားလာ လွယ်ထားသောကျောပိုးအိတ်အတွင်းမှ စိတ်ကြွရူးသွပ်ဆေးပြား ၁၆,၈၂၈ ပြား သိမ်းဆည်းရမိခဲ့သဖြင့် အောင်နိုင်ဝင်း(ခ)မတ်ဟူရှင်(ခ)မတ်ရှင်(၃၇)နှစ်၊ အောင်နိုင်တူး(ခ)မန်ဂျားလာ(၃၀)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သိရသည်။
ဆွေဦး