ရန်ကုန်၊ ဩဂုတ် ၁၄
ရန်ကုန်တိုင်းဒေသကြီးအတွင်း မြို့နယ် ၂၀ တွင် ဖွင့်လှစ်ထားသော ကိုဗစ်ကာလ၏ အခမဲ့ ဖျားနာသီးသန့် ဆေးခန်း( Ferver Clincs )များတွင် ဖျားနာလူနာများအပြင် တီဘီရောဂါရှိလူနာများကို ရောဂါရှာဖွေ စမ်းသပ်စစ်ဆေးခြင်း နီးစပ်ရာကျန်းမာရေးဌာနများတွင် ကုသမှုခံယူရန်စီစဉ်ပေးခြင်းတို့ကို ဆောင်ရွက်ပေးနေကြောင်း လူထုအခြေပြုဖျားနာလူနာကုသဆေးခန်းများ ကွန်ရက်(ရန်ကုန်)မှသိရသည်။
" ကျွန်တော်တို့က မြို့နယ် ၂၀ မှာ ဖျားနာသီးသန့်ဆေးခန်း ( Ferver Clincs) တွေ ဖွင့်ထားပါတယ်။ တချို့ မြို့နယ်တွေမှာဆိုလည်း နီးစပ်ရာဆေးရုံတွေနဲ့ပူးပေါင်းပြီး ဖွင့်လှစ်ထားတာရှိတယ်။ ဒီဆေးခန်းတွေ မှာ ကိုဗစ်ကာလရဲ့ ဖျားနာလူနာစစ်ဆေးပေးတာတွေအပြင် တီဘီရောဂါတိုက်ဖျက်ရေးအတွက် တီဘီရောဂါစစ်ဆေးတာတွေကိုလည်း အခမဲ့ဆောင်ရွက်ပေးပါတယ်။ အခု သြဂုတ် ၁ ရက်ကနေ လလယ်ပိုင်း ဒီနေ့ အထိဆိုရင် ဒီဆေးခန်းတွေမှာ တီဘီရောဂါလူနာပေါင်း ၄၀ဝ ကျော်လောက် လာပြကြတယ်။ ဒါကို ရောဂါ ရှာဖွေစစ်ဆေးလိုက်တဲ့အခါမှာ တီဘီရောဂါလက္ခဏာတွေ့ရှိသူလူနာ ၅၀ ကျော်လောက်ရှိနေတယ်။ ဒါကို ကျန်းမာရေးကုသမှုခံယူဖို့ နီးစပ်ရာကျန်းမာရေးဦးစီးဌာနတွေနဲ့ချိတ်ဆက်ပြီး ဆောင်ရွက်စေပါတယ်။ အခုနောက်ပိုင်းတဖြည်းဖြည်းနဲ့ လူနာနည်းလာတဲ့ မြို့နယ်တွေကိုလည်း တစ်မြို့နယ် ဆေးခန်းတစ်ခုမလုပ်တော့ ဘဲ လေးမြို့နယ်ကို သင့်တင့်တဲ့နေရာမှာ ဆေးခန်းတစ်ခုဖွင့်သွားဖို့ လုပ်ဆောင်နေပါတယ်"ဟု လူထုအခြေပြု ဖျားနာလူနာကုသဆေးခန်းများ ကွန်ရက်(ရန်ကုန်)တာဝန်ခံ ဒေါက်တာကျော်မင်းထွန်းကပြောသည်။
ကိုဗစ်ကာလအတွင်း ရန်ကုန်တိုင်းဒေသကြီးအတွင်း လှိုင်သာယာ၊ အင်းစိန်၊ မရမ်းကုန်း၊ ရွှေပြည်သာ၊ တောင်ဥက္ကာလာပ၊ ရန်ကင်း၊ တာမွေ၊ မင်္ဂလာတောင်ညွန့်၊ သာကေတ၊ ဒေါပုံ အပါအဝင် မြို့ နယ် ၂၀ တွင် ဖွင့်လှစ်ထားသော ဖျားနာသီးသန့်ဆေးခန်း( Ferver Clincs )များတွင် ကိုဗစ်ကာလ၏ ဖျားနာလူနာများကို ကုသပေးသည့်အပြင် ရွေ့လျားတီဘီရောဂါရှိဖွေရေးစက်ဖြင့် စမ်းသပ်စစ်ဆေးပေးခြင်း၊ ရောဂါသံသယရှိပါက သလိပ်များပါ စစ်ဆေးပေးကြောင်းသိရသည်။ သြဂုတ် ၁ ရက်မှ စတင်ကာ ယနေ့အချိန်ထိ တီဘီရောဂါလူနာ အယောက် ၄၀ဝ ခန့် လာရောက်ပြသကြပြီး ယခုလလယ်ပိုင်းအထိ တီဘီရောဂါတွေရှိသူ ၅၀ ဝန်းကျင်ခန့်ရှိကြောင်း သိရသည်။ တီဘီရောဂါစမ်းသပ်တွေ့ရှိသူများအား နီးစပ်ရာကျန်းမာရေးဌာနများနှင့် ဆက်သွယ်ကာတီဘီရောဂါတိုက်ဖျက်ရေးအတွက် ဆက်လက်ကုသဆောင်ရွက်သွားနိုင်ရန် စီစဉ်ပေးကြောင်းသိရသည်။
ထို့ပြင် ကိုဗစ်ကာလအတွင်း ရာသီအကူးအပြောင်းတွင်အဖြစ်များသော ကိုယ်ပူချိန်တက်ခြင်း၊ လည်ချောင်းနာ၊ ချောင်းဆိုး၊ နှာစေးဖြစ်နေသည့် လူနာများ၊ အနံ့၊ အရသာ ရုတ်တရက်ပျောက်သောလူနာများ၊ COVID-19 ရောဂါပိုးရှိသော Positive လူနာများနှင့် ထိတွေ့ဖူးခဲ့သူများ၊ ခရီးသွားရာဇဝင်ရှိသူများကို ရောဂါ စစ်ဆေးခြင်း၊ လက်ခံကုသပေးခြင်းနှင့် COVID-19 သံသယလူနာများကိုစစ်ဆေးကာ ချွေးထုတ်ပြီး လိုအပ်လျှင် ဆေးရုံသို့ပို့ဆောင်ကာ ဆောင်ရွက်ပေးကြောင်းသိရသည်။
ထိုဖျားနားသီးသန့်ဆေးခန်း (Ferver Clinics ) တွင် ရန်ကုန်တိုင်းဒေသကြီးအတွင်းရှိ အထွေထွေရောဂါကုဆေးရုံကြီးများရှိ ဖျားနာကုဌာနများမှ ဆရာဝန်ကြီးများ၊ အမျိုးသားတီဘီရောဂါတိုက်ဖျက်ရေးမှ ဆရာဝန်များက စေတနာ့ဝန်ထမ်းအဖြစ် လာရောက်၍ ရက်သတ္တတစ်ပတ်တွင် အင်္ဂါ ၊ ဗုဒ္ဓဟူး ၊ ကြာသတေး၊ သောကြာ၊ စနေနေ့များတွင် မြို့နယ်အလိုက် နံနက် ၉ နာရီမှ ၁၂ နာရီအထိ ဖွင့်လှစ်ပေးကာ အခမဲ့ကျန်းမာရေးဝန်ဆောင်မှုပေးကြောင်း သိရသည်။
မင်းခ