ကရင်အာဇာနည်နေ့ အခမ်းအနား ပိတ်ပင်ဖျက်ဆီးခံရခြင်းအပေါ် သတင်းစာရှင်းလင်းပွဲပြုလုပ်
ရန်ကုန်၊ ဩဂုတ် ၁၄
နှစ်(၇၀) ပြည့် ကရင်အာဇာနည်နေ့အား ပိတ်ပင်ဖျက်ဆီးခံရခြင်းအပေါ် သတင်းစာရှင်းလင်းပွဲအား သြဂုတ် ၁၃ ရက်၊ နံနက် ၁၀ နာရီခွဲအချိန်က လှည်းတန်းလမ်းဆုံအနီး ဦးထွန်းလင်းခြံလမ်း စာပေလောက စာအုပ်ဆိုင်၏အပေါ်ထပ် တတိယအလွှာတွင် ပြုလုပ်ခဲ့ကြသည်။
သတင်းစာရှင်းလင်းပွဲကိုဒေါ်နော်အုန်းလှl စောထွန်းထွန်း၊ နော်ဆဲဆဲ ၊ စသိန်းဇော်မင်း ၊ စောကွာလာနှင့် နော်နမ့်မေသဉ္ဇာတို့က ဦးဆောင်ပြုလုပ်ခဲ့ခြင်းဖြစ်သည်။ "မနေ့က ကျွန်မတို့လုပ်တဲ့ပွဲက ပိတ်ပင်ဖျက်ဆီးခံရ တယ်။ ကျမတို့က ရိုးသားခဲ့တယ်။ အစိုးရဘက်က ကျမတို့အပေါ် မရိုးသားဘူး။ ဒါကြောင့် အစိုးရကိုမယုံတော့ ဘူး"ဟု နော်နမ့်မေသဉ္ဇာကပြောသည်။
သတင်းစာရှင်းလင်းပွဲကို Covid-19 ဆိုင်ရာ ကျန်းမာရေးနှင့်ပတ်သက်သည့် လိုက်နာရမည့်စည်းမျဉ်း စည်းကမ်းနှင့်အညီ ပြုလုပ်ခဲ့ပြီး သတင်းမီဒီယာ ၁၅ ဦးခန့် တက်ရောက်ခဲ့ကြသည်။ "ကျွန်တော်တို့ကို (ပ)နံပါတ်တော့မပြောလိုက်ဘူး။ ၁၅ ရက်အတွင်း ငြိမ်းစုစီပုဒ်မ၂၀ နဲ့တရားစွဲမယ်လို့တော့ပြောတယ်"ဟု စသိန်းဇော်မင်း ကပြောသည်။ ၎င်းဖြစ်စဉ်နှင့်ပတ်သက်၍ NLD CEC ကအခမ်းအနားဦးဆောင်သူများကို ဗဟန်းမြို့နယ်ရှိ အမျိုးသားဒီမိုကရေစီအဖွဲ့ချုပ် ဗဟိုရုံးတွင် ဩဂုတ် ၁၄ ရက်၊ မွန်းလွဲ ၁ နာရီတွင် တွေ့ဆုံ ဆွေးနွေးရန် ချိန်းဆိုထားကြောင်း သတင်းစာရှင်းလင်းပွဲဦးဆောင်သူ တစ်ဦးဖြစ်သည့် စောထွန်းထွန်းက ပြောသည်။
နှစ်(၇၀)ပြည့် ကရင့်အာဇာနည်နေ့အခမ်းအနားကို ရန်ကုန်မြို့၊ မဟာဗန္ဓုလပန်းခြံရှေ့၊ ကားပါကင်၌ ဩဂုတ် ၁၂ ရက်၊ နံနက် ၈ နာရီအချိန်က ကျင်းပခဲ့ရာ ကျောက်တံတားမြို့နယ် ရဲစခန်းမှရဲတပ်ဖွဲ့ဝင်များ က သတ်မှတ်ထားသည့် အချိန်မစေ့မီလာရောက်တားမြစ်ခဲ့ပြီး အခမ်းအနားတွင်လွှင့်တင်ထားသည့် ကရင်အမျိုးသားအလံကို ဖြုတ်ချခံခဲ့ရသည်။ ယင်းနောက်အခမ်းအနားသို့ ရောက်ရှိနေသည့် ဒေါ်စိန်ထွေးအား ယမန်နှစ်က ၆၉ နှစ်မြောက်ကရင့်အာဇာနည်နေ့ အခမ်းအနားကျင်းပခဲ့ရာတွင် ခွင့်ပြုမိန့်မတင်သည့်အမှုဖြင့်ဖမ်းဆီးခေါ်ဆောင်သွားပြီးနောက် ကရင်လူငယ်များဖြစ်သည့် စသိန်းဇော်မင်း နှင့် စောကွာလာတို့ကိုလည်း ရဲစခန်းသို့ ခေါ်ယူသွားခဲ့သည်။ ရဲစခန်းတွင် စသိန်းဇော်မင်းနှင့်စောကွာလာတို့ကို ကိုယ်ရေးအချက်အလက် မေးမြန်းစိစစ်ပြီး ကိုယ်တိုင်ခံဝန်ဖြင့် ပြန်လွှတ်ပေးခဲ့ကြောင်း သိရသည်။
"မစိန်ထွေးကတော့ မနှစ်ကအမှုအတွက် အဖမ်းခံရပြီး ထောင်တန်းပို့လိုက်တယ်။ ဒီကလေး ၂ ယောက်ကိုတော့ စခန်းခေါ်သွားပြီး မေးစမ်းပြီးပြန်လွှတ်တယ်။ ဘာဆက်ဖြစ်အုံးမယ်မသိသေးဘူး။ မနေ့ကဖြစ်စဉ်တော့ အတော်ရုပ်ဆိုးပါတယ်။ အဲဒီအတွက်ကျွန်မတို့ကတော့ ရန်ကုန်တိုင်းဒေသကြီးအစိုးရ အဖွဲ့ကို တရားစွဲဆိုသွားဖို့ စီစဉ်နေပါတယ်"ဟု နော်အုန်းလှက ပြောသည်။
ရွှေမြင့်ဦး(ရွေပြည်သာ)
