စာမေးပွဲအဖြေလွှာ ပြန်စစ်ပေးရန် လျှောက်ထားမှုကို လတ်တလောတွင် ခွင့်ပြုမည်မဟုတ်

ရန်ကုန် ဩဂုတ်  ၁၄

တက္ကသိုလ်ဝင်စာမေးပွဲအဖြေလွှာ ပြန်လည်စစ်ဆေးပေးရန် လျှောက်ထားမှုများကို လတ်တလောတွင် ခွင့်ပြုမည်မဟုတ်ဘဲ လျှောက်ထားနိုင်သည့် အချိန်နှင့် အစီအစဉ်အသေးစိတ်ကို ကြိုတင်ကြေညာပေးသွားမည် ဖြစ်ကြောင်းပညာရေးဝန်ကြီးဌာနမှ သတင်းထုတ်ပြန်လိုက်သည်။

အဆိုပါ အဖြေလွှာပြန်စစ်ပေးရန် လျှောက်လွှာကိစ္စကို COVID-19 ကာကွယ်၊ ထိန်းချုပ်၊ ကုသရေးအမျိုးသားအဆင့်ဗဟိုကော်မတီထံတင်ပြသွားမည်ဖြစ်ပြီးကော်မတီမှ ခွင့်ပြုမှသာအဖြေလွှာပြန်လည်စစ်ဆေးခြင်း    လုပ်ငန်းများကို လုပ်ဆောင်သွားမည်ဟုထုတ်ပြန်ချက်တွင် ဖော်ပြထားသည်။

အဖြေလွှာပြန်လည်စစ်ဆေးရန်အတွက် ဖြေဆိုသူကိုယ်တိုင်(သို့မဟုတ်)မိဘကစာစစ်ဦးစီးဌာနရုံးများသို့ တင်ပြရမည်ဖြစ်ပြီး ယင်းစာမေးပွဲအဖြေလွှာကိုဘာသာရပ်အလိုက် စာစစ်မှူးချုပ်များဦးဆောင်သည့် စာစစ်အဖွဲ့ က ပြန်စစ်ဆေးကာ မူလစစ်ဆေးမှုများနှင့် ကွဲလွဲမှုရှိ၊ မရှိကိုအကြောင်းပြန်ပေးရမည်ဖြစ်သည်။

COVID-19 ကပ်ရောဂါအန္တရာယ်ကြောင့် တက္ကသိုလ်ဝင်စာမေးပွဲအောင်စာရင်းများကို ဩဂုတ် ၉ ရက်က ပညာရေးဝန်ကြီးဌာန ဝက်ဘ်ဆိုက်တွင် ကြေညာခဲ့ပြီး ဩဂုတ် ၁၀ ရက်တွင် ကျောင်းအလိုက်အောင်စာရင်းများကို အခြေခံပညာအထက်တန်းကျောင်းများတွင် ကပ်ထားခဲ့ကြောင်း သိရသည်။

ကျော်စိုးသူ(City News)