ဂျာမနီတင်းနစ်မယ် အိန်ဂျယ်လီခါဘာက နည်းပြသစ်အဖြစ် သောဘင်ဘက်ဇ်ကို ခန့်အပ်
ဇူလိုင် ၃၀
ဂျာမနီတင်းနစ်မယ် အိန်ဂျယ်လီခါဘာသည် နည်းပြသစ်အဖြစ် ဂျာမနီလူမျိုး သောဘင်ဘက်ဇ်ကို ခန့်အပ်ခဲ့ကြောင်း သိရသည်။ ယင်းတို့နှစ်ဦးသည် သုံးနှစ်ခန့်လက်တွဲခဲ့ဖူးပြီး ယခု ဒုတိယအကြိမ် နည်းပြ အဖြစ် ပြန်လည်ခန့်အပ်ခဲ့ခြင်းဖြစ် သည်။
အိန်ဂျယ်လီခါဘာသည် နည်းပြ သောဘင်ဘက်ဇ်နှင့် လက်တွဲခဲ့သည့်ကာလတစ်လျှောက် ဩစတြေးလျ အိုးပင်းတင်းနစ် ချန်ပီယံဆုနှင့် ယူအက်စ်အိုးပင်းတင်းနစ်ချန်ပီယံဆုတို့ကိုဆွတ်ခူးနိုင်ခဲ့သကဲ့သို့ ၂၀၁၆ ခုနှစ် ရီယိုအိုလံပစ်ပြိုင်ပွဲတွင်လည်း ငွေတံဆိပ်ဆု ဆွတ်ခူးနိုင်ခဲ့ကာ ၂၀၁၆ ခုနှစ် စက်တင်ဘာလက ကမ္ဘာ့အဆင့် ၁ နေရာထိ တက်ရောက်နိုင်ခဲ့သည်။
နည်းပြ သောဘင်ဘက်ဇ်က “အိန်ဂျယ်လီခါဘာဟာ ကစားသမားကောင်းဖြစ်သလို ပုဂ္ဂိုလ်ရေးအရလည်း ကောင်းပါတယ်။ သူဟာ ကြိုးစားအားထုတ်မှုကောင်းတဲ့ ကစားသမားဖြစ်သလို အမြဲတမ်းအနိုင်ရလဒ်လိုချင် နေတဲ့သူပါ။ ကျွန်တော်တို့ကြား တစ်ယောက်နဲ့တစ်ယောက်လည်း နားလည်မှုအပြည့်ရှိကြပါတယ်”ဟု ပြောကြားခဲ့သည်။
(သူရိန်)
