နာနတ်သီးထွက်ရှိချိန်တွင် ဈေးနှုန်းကျဆင်းပြီးအရောင်းအဝယ်နည်းနေ
လားရှိုး ဇူလိုင် ၂၇
ရှမ်းပြည်နယ်(မြောက်ပိုင်း)၊ လားရှိုးမြို့ သစ်သီးဝလံအရောင်းဆိုင်များတွင် နမ့်ပျဉ်ကျေးရွာ၊ ပန်မုံကျေးရွာနှင့် တောင်လန်းကျေးရွာတို့မှ ထွက်ရှိသောနာနတ်သီးများဈေးကွက်သို့ရောက်ရှိလာသော်လည်း ယခုနှစ်တွင်နာနတ်သီးအထွက်နည်းပြီး တရုတ်နိုင်ငံမှ အဝယ်ပိတ်ထားခြင်းတို့ကြောင့် ဈေးနှုန်း ကျဆင်းကာအရောင်းအဝယ် အေးနေကြောင်းသိရသည်။
''အခုထွက်ရှိတဲ့အသီးတွေကနမ့်ပျဉ်၊ပန်မုံနဲ့ တောင်လန်းကျေးရွာဒေသကထွက်ရှိတဲ့ အသီးတွေပါ။ ပြီးခဲ့တဲ့နှစ်ကတစ်ရက်ကိုအလုံးရေ ၇ဝဝဝ၊ ၈ဝဝဝ လောက်ဝင်တယ်။ ဒီနှစ်ကတော့တစ်ရက်ကိုအလုံး ၂၅ဝဝ လောက်ပဲဝင်တယ်။ အရင်နှစ်ကဆိုရင် အနိမ့်ဆုံးငွေကျပ် ၃၅ဝ ကနေအမြင့်ဆုံးငွေကျပ် ၅ဝဝ အထိရတယ်။ ဒီနှစ်ကတော့ငွေကျပ် ၃၅ဝ၊ ၄ဝဝ အထိပဲရှိတယ်''ဟုသစ်သီးဝလံရောင်းချသူတစ်ဦးကပြောသည်။
နာနတ်သီးများထွက်ရှိလာသော်လည်းဒေသတွင်းစားသုံးမှုနည်းပါးခြင်း၊ တရုတ်နိုင်ငံမှ အဝယ်ပိတ်ထား ခြင်းကြောင့်အရောင်းအဝယ်နည်းနေပြီး စိုက်ပျိုးရောင်းချသူများအခက်အခဲဖြစ်ပေါ်လျက်ရှိသည်။
(သူရိန်)
