လှိုင်သာယာ( အနောက်ပိုင်း)မြို့နယ်တွင် လေးထပ်တိုက်အပေါ်ဆုံးမှ ရေကန်ပွင့်၍ ကပ်လျက်ရှိသော နှစ်ထပ်ဆောင်ပေါ်သို့ ပြိုကျမှုဖြစ်ပွား
ရန်ကုန် ဧပြီ ၁၃ ဧပြီ ၁၃ ရက်၊ နံနက် ၅ နာရီက လှိုင်သာယာ(အနောက်ပိုင်း)မြို့နယ်၊ အမှတ်(၂၀)ရပ်ကွက်၊ ဗိုလ်တေဇပတ်လမ်း၊ အိမ်အမှတ်−၁၆၀၉/က၊ လေးထပ်တိုက်အပေါ်ဆုံးမှ ရေကန်ပွင့်၍ အမှတ်−၁၆၀၉/ခ နှစ်ထပ်ဆောင်ပေါ်သို့ပြိုကျရာ အခန်းအတွင်းနေထိုင်သူ မောင်နှမ ၄ ဦးမှာ ၁ ဦးသေးဆုံး၍ ၃ ဦးဒဏ်ရာရကာ လှိုင်သာယာပြည်သူ့ဆေးရုံသို့ ပို့ဆောင်ထားကြောင်းသိရသည်။ နှစ်ထပ်ဆောင်အခန်းအတွင်းနေထိုင်သူ မခိုင်သက်ဝေ အသက်(၁၂)နှစ်မှာသေဆုံးခဲ့ပြီး ဦးချစ်ကို အသက်(၃၀)နှစ်၊ ဒေါ်သူဇာဝင်း အသက်(၃၅)နှစ်နှင့် မောင်အောင်ဟိန်းခန့် အသက်(၁)နှစ်တို့မှာ ထိခိုက် ဒဏ်ရာများရရှိ၍ လှိုင်သာယာပြည်သူ့ဆေးရုံသို့ပို့ဆောင်ထားပြီး ရပ်ကွက်အုပ်ချုပ်ရေးမှူးနှင့် သက်ဆိုင်ရာ တာဝန်ရှိသူများက ဆက်လက်ဆောင်ရွက်လျက်ရှိကြောင်းသိရသည်။ မြသန္တာဝင်း(ပြန်/ဆက်)
