ရုပ်ရှင်နှစ်(၁၀၀) ပြည့်ပွဲတွင် Tik Tok ပြိုင်ပွဲထည့်သွင်းထား
ရန်ကုန် ဇူလိုင် ၂၃
ရုပ်ရှင် နှစ်(၁၀၀) ပြည့် အထိမ်းအမှတ်ပွဲတွင် Tik Tok ပြိုင်ပွဲပါဝင်နေသည့်အပေါ် သရုပ်ဆောင် ဖိုးကျော်က “ရုပ်ရှင်နှစ်တစ်ရာပြည့်မှာ Tik Tok ပြိုင်ပွဲတဲ့ သေလို့ရတယ်ဗျာ။ သူတို့တော့ မသိဘူး ကျွန်တော်ကတော့ ရှက်တယ်ဗျ။ ကျွန်တော်က ဘာမှမဟုတ်ပါဘူး၊ အပေအတေလောက်ဆိုပေမယ့် ကျွန်တော်ရှက်တယ်။ နိုင်ငံတကာမှာဆို Tik Tok က အနုပညာမဟုတ်ဘူးဗျ။ ကလေးကစားစရာပါပဲ။ ကျွန်တော်လည်း ကိုယ့်ထမင်း ကိုယ်စားပြီး ဒီစကားကို ပြောရတာပါ။ အမှန်ကတော့ ကောင်းစေချင်လို့ ကျွန်တော်ပြောတာပါ” ဟု ပြောထားသည်။ မြန်မာ့ရုပ်ရှင်နှစ်တစ်ရာပြည့် ပြိုင်ပွဲတွင် Tik Tok ပြိုင်ပွဲထည့်သွင်းကျင်းပမည်ဆိုသည့် သတင်းသည် ဇူလိုင် ၅ ရက်ကတည်းက လူမှုကွန်ရက်စာမျက်နှာပေါ်မှာ ပျံ့နှံ့ခဲ့သည်။
Tik Tok ပြိုင်ပွဲအပေါ် ဖိုးကျော်၏သဘောထားကို ပြောပြပြီးနောက် ယင်း၏အနုပညာလှုပ်ရှားမှုများ အကြောင်း ထပ်မံပြောထားသည်။ ထုတ်လုပ်သူများက မငှားကြသည့်အတွက် ဇာတ်ကားများလည်း ယခင်လောက်ရိုက်ခွင့်မရတော့ကြောင်း ပြောထားသည်။
ဖိုးကျော်သည် ဝါရင့်သရုပ်ဆောင်ကျော်ဟိန်းနှင့်အတူ " လူမိုက် တစ်ရာ" ဆိုသည့် ရုပ်ရှင်ဇာတ်ကားကြီး ရိုက်ကူးခဲ့ဖူးသူဖြစ်သည်။ အဆိုပါ ရုပ်ရှင်ဇာတ်ကားကြီးသည် ပရိသတ်အားပေးမှု အခိုင်အမာရရှိခဲ့သည့် ဇာတ်ကားတစ်ကားဖြစ်သည်။ သရုပ်ဆောင်ဒွေးနှင့်လည်း ဗီဒီယိုဇာတ်ကား၊ ရုပ်ရှင်ဇာတ်ကားများစွာတွင် အတူတွဲသရုပ်ဆောင်ခဲ့ဖူးသူတစ်ယောက်ဖြစ်သည်။ အမျိုးသားဇာတ်ဆောင်ဆုအကယ်ဒမီထူးချွန်ဆုကို လည်း ၂၀၀၆ ခုနှစ်တွင် "မျှော်လင့်ခြင်းများစွာ" ဆိုသည့် ရုပ်ရှင်ဇာတ်ကားကြီးဖြင့် ရရှိထားသူဖြစ်သည်။
(HWY)
