ဧရာဝတီလင်းပိုင် ထိန်းသိမ်းကာကွယ်ရေးဇုန်အတွင်းရှိ ကလေးငယ်များကို လင်းပိုင်အရုပ်များ ဝေမည်
ရန်ကုန် ဇူလိုင် ၁၉
ဧရာဝတီလင်းပိုင် ထိန်းသိမ်းကာကွယ်ရေး ထိန်းသိမ်းရေးဇုန်အတွင်းရှိ ကလေးငယ်များကို လင်းပိုင် အရုပ်များ ဝေသွားမည်ဖြစ်ကြောင်း Natural Green Alliance သဘာဝစိမ်းအဖွဲ့မှ သိရသည်။
ဧရာဝတီလင်းပိုင်များသည် တရားမဝင်ဘက္ကထရီလျော့တိုက်ငါးဖမ်းဆီးခြင်း၊ ငါးဖမ်းပိုက်များတွင် ငြိတွယ်ခြင်း၊ ရေယာဉ်ပန်ကာများ၏ ခုတ်ဖြတ်ခံရခြင်းများမရှိစေရန် အသိပညာပေးလှုပ်ရှားမှုအဖြစ် လုပ်ဆောင်ခြင်းဖြစ်ကြောင်းသိရသည် ။
" ဧရာဝတီလင်းပိုင်ဆိုတာ နိုင်ငံအတွက် သက်ရှိ သဘာ ဝအရင်းအမြစ် ဒါကိုသေချာထိန်းသိမ်းဖို့လိုတယ်။ လင်းပိုင်တွေကို လူ့ပယောဂကြောင့် သေဆုံးရမှုတွေ လျော့ကျသွားစေဖို့လုပ်ဆောင်တာပါ " ဟု Natural Green Alliance သဘာဝစိမ်းအဖွဲ့ ဦးဆောင်သူ ဦးမောင်မောင်ဦးက ပြောသည် ။
ဧရာဝတီလင်းပိုင်များ မျိုးတုံးပျောက်ကွယ်ခြင်းမရှိစေရေးအတွက် လင်းပိုင်အရုပ်များကို သြဂုတ်လ အတွင်းတွင် လင်းပိုင်ရုပ်စုစုပေါင်း ၂၀၀ ကျော်သွားရောက်ဝေမည်ဖြစ်သည် ။
"ဒီလိုအရုပ်ကလေးတွေနဲ့ပညာပေးလိုက်တဲ့အခါကျတော့ ဒီအရုပ်ကလေးတွေ မြင်တဲ့အခါတိုင်း ဒါတွေကိုထိန်းသိမ်းရမယ် ကာကွယ်ရမယ်ဆိုတဲ့အသိတွေဖြစ်နေမယ်" ဟု လင်းပိုင်အရုပ်ကလေးများ လှူဒါန်းပေးသည့် ဦးစိန်ဝင်း(မောင်စိန်ဝင်းနှင့်ညီများကုမ္ပဏီ) ကပြောသည်။
ဧရာဝတီလင်းပိုင်များသည် မန္တလေးတိုင်းဒေသကြီး မင်းကွန်းဒေသမှ ကချင်ပြည်နယ် ဗန်းမော်မြို့အထိ နေထိုင်ကျက်စားကြပြီး ဧရာဝတီလင်းပိုင်များအား နောက်ဆုံးကောက်ယူခဲ့သည့် စာရင်းများအရ ပထမ ထိန်းသိမ်းရေး ဧရိယာအတွင်းတွင် လင်းပိုင် ၂၅ ကောင်၊ ဒုတိယထိန်းသိမ်းရေးဧရိယာအတွင်းတွင် လင်းပိုင် ၃၄ ကောင်ရှိကြောင်း သိရသည် ။
၂၀၁၉ ခုနှစ်တွင် ဧရာဝတီလင်းပိုင်သုံးကောင် သေဆုံးပြီး ၂၀၂၀ ပြည့်နှစ် ဇန်နဝါရီလမှ ယခုအထိ စုစုပေါင်းခြောက်ကောင်အထိ သေဆုံးမှုများရှိလာပြီဖြစ်သည်။
မေဘယ်လ်အောင်
