သွေးလှူဒါန်းလိုသူများအတွက် သင်္ကြန်ရက်များတွင် အမျိုးသားသွေးဌာန(ရန်ကုန်)အား ဖွင့်ပေးထားမည်

ရန်ကုန် ဧပြီ ၁၁ သင်္ကြန်ရက်များအတွင်း သွေးလှူဒါန်းလိုသူများအတွက် အမျိုးသားသွေးဌာန(ရန်ကုန်)အား တစ်နေကုန် ဖွင့်ပေးထားမည်ဖြစ်ကြောင်း အဆိုပါ အမျိုးသားသွေးဌာနမှ တာဝန်ရှိသူတစ်ဦးက ပြောသည်။ ရန်ကုန်မြို့တွင် ကိုရိုနာဗိုင်းရပ်စ်ရောဂါ(COVID-19) ကူးစက်ပြန့်ပွားမှုကို ကြိုတင်ကာကွယ်သည့်အနေဖြင့် လူစုလူဝေးများ မဖြစ်ပေါ်စေရန် သွေးလှူဒါန်းပွဲအချို့အား ရက်အကန့်အသတ်မရှိ ရွှေ့ဆိုင်းလိုက်သော်လည်း အမျိုးသားသွေးဌာန(ရန်ကုန်)တွင် သွေးလှူဒါန်းလိုသူများအား လက်ခံဆောင်ရွက်ပေးလျက်ရှိကြောင်း သိရသည်။ အလားတူ နှစ်ဆန်းတစ်ရက်နေ့ အပါအဝင် ယခုနှစ် သင်္ကြန်ရက်များ၊ အလုပ်နားရက်များတွင် သွေးလှူဒါန်း လိုသူများအတွက်လည်း အဆင်ပြေစေရန် အမျိုးသားသွေးဌာန(ရန်ကုန်)ကို နေ့စဉ် နံနက် ၈ နာရီမှ ည ၇ နာရီ အထိ ဖွင့်လှစ်ထားကာ သွေးအလှူရှင်များအား လက်ခံဆောင်ရွက်ပေးသွားမည်ဖြစ်ကြောင်း သိရသည်။ သွေးလှူဒါန်းလိုသူများအနေဖြင့် အင်တာနက်ဝက်ဘ်ဆိုက် - www.donatebloodmyanmar.org တွင် ကြိုတင်စာရင်းပေးသွင်းပြီး သွေးလှူဒါန်းနိုင်သလို ကိုယ်တိုင်လာရောက်စာရင်းပေးသွင်းကာ တစ်ခါတည်း သွေးလှူဒါန်းလိုပါကလည်း အဆင်ပြေစေရန် သက်ဆိုင်ရာ တာဝန်ရှိသူများက စီစဉ်ဆောင်ရွက်ပေးလျက် ရှိကြောင်း သိရသည်။ (ဆောင်းဦး)