လက်ရှိ ဝင်ဘယ်ဒန် ချန်ပီယံ ဆီမိုနာဟာလက် ယူအက်စ်အိုးပင်းပြိုင်ပွဲအတွက် စိတ်လှုပ်ရှားနေ

ဇူလိုင်   ၁၆

ယခုနှစ် ယူအက်စ်အိုးပင်းပြိုင်ပွဲတွင် ပါဝင်ယှဉ်ပြိုင်ဖို့အတွက် အနည်းငယ်စိုးရိမ်စိတ်တွေဖြစ်မိတယ်လို့  လက်ရှိ ဝင်ဘယ်ဒန်ချန်ပီယံ ဆီမိုနာဟာလက် ဖွင့်ဟဝန်ခံခဲ့ပါတယ်။ ယခုနှစ်တွင်ကျင်းပရမယ့် ဝင်ဘယ်ဒန် ချန်ပီယံရှစ်ပြိုင်ပွဲကို COVID-19 ကပ်ရောဂါကြောင့်ဖျက်သိမ်းလိုက်ရပါတယ်။ သို့ရာတွင် ယူအက်စ်အိုးပင်း ပြိုင်ပွဲကိုမူ နယူးယောက်မြို့တွင် ဩဂုတ်လ ၃၁ ရက်မှာ ပရိသတ်မပါဝင်ဘဲ ကွင်းတံခါးပိတ်ကျင်းပသွားမှာ ဖြစ်ပါတယ်။

COVID-19 ကြောင့် အားကစားလှုပ်ရှားမှုများရပ်တန့်ခဲ့ပြီးနောက် ပထမဆုံးပြန်လည်ကျင်းပမဲ့ ဂရင်းစလင်းပြိုင်ပွဲဖြစ်လာပေမည်။ COVID-19 ရောဂါပြန့်ပွားမှုများ ဆက်လက်ဖြစ်ပေါ်နေဆဲဖြစ်တာကြောင့် ယူအက်စ်အိုးပင်းပြိုင်ပွဲတွင် ပါဝင်ယှဉ်ပြိုင်ကြဖို့ တင်းနစ်သမားအချို့ စိုးရိမ်ပူပန်မှုများရှိနေခဲ့ပါတယ်။              “ဒီပြိုင်ပွဲကခက်ခဲမှုတွေရှိလာနိုင်ပါတယ်။ ကပ်ရောဂါအတွက် ထိန်းချုပ်ကန့်သတ်ရေးအစီအစဉ်တွေအပေါ်  မူတည်ပါတယ်။ ကျွန်မကတော့ ဒီပြိုင်ပွဲမှာ ပါဝင်ယှဉ်ပြိုင်ဖို့အနည်းငယ်စိုးရိမ်ပြီး စိတ်လှုပ်ရှားမှုတွေရှိနေ ပါတယ်။ ယခုအချိန်မှာ ကျွန်မ ဘာပြောရမှန်းတောင်မသိပါဘူး၊ ပြန်ကစားဖို့တော့ စိတ်ထက်သန်ပါတယ်” လို့ ဆီမိုနာဟာလက်က ဖွင့်ဟခဲ့ပါတယ်။                                                                                             

 (SO)