မန္တလေးတက္ကသိုလ်ပင်မဆောင် မြေအောက်ထပ်အခန်းများနှင့် အင်းဝဆောင်ပြင်ဆင်ထိန်းသိမ်းမှုကြည့်ရှု
မန္တလေး၊ ဇူလိုင် ၁၁
မဟာအောင်မြေမြို့နယ် တိုင်းဒေသကြီးလွှတ်တော်ကိုယ်စားလှယ် ဦးဇော်ဇော်အောင်၊ မြို့နယ်အုပ်ချုပ် ရေးမှူး ဦးနိုင်ဝင်း၊ မန္တလေးတိုင်းဒေသကြီး ဆောက်လုပ်ရေးလုပ်ငန်းများ အရည်အသွေးစစ်ဆေးရေးအဖွဲ့ ခေါင်းဆောင် ဦးပွနှင့် အဖွဲ့ဝင်များသည် ဇူလိုင် ၁၀ ရက် နံနက် ၉ နာရီက မန္တလေးတက္ကသိုလ်ဝင်းအတွင်းရှိ နယ်မြေရုံးအဆောက်အအုံ အကြီးစားပြင်ဆင်ခြင်းလုပ်ငန်းခွင်သို့ ရောက်ရှိစစ်ဆေးရာ သာထွန်းအောင်ကုမ္ပဏီမှ တာဝန်ရှိသူများက နံရံအက်ကြောင်းများကို သံချောင်း၊ Staplers ဖြင့်ချုပ်၍ ဘိလပ်မြေဖြင့်ပြုပြင်ထိန်းသိမ်း နေမှုများကိုလည်းကောင်း၊ အေဝမ်းကုမ္ပဏီမှ တာဝန်ယူဆောင်ရွက်နေသော မန္တလေးတက္ကသိုလ် ၅ ထပ်ဆောင် ဆောက်လုပ်ခြင်းလုပ်ငန်းခွင်နှင့် United Golden Rays ကုမ္ပဏီမှ တာဝန်ယူဆောင်ရွက်သော အင်းဝဆောင် အကြီးစားပြင်ဆင်ခြင်းလုပ်ငန်း၊ မန္တလေးတက္ကသိုလ်ပင်မဆောင်သို့သွားရောက်ပြီး မြေအောက်ထပ်အခန်းများ ကို ဓာတုဆေးများအသုံးပြုကာ နည်းပညာအသစ်ဖြင့် နံရံအက်ကြောင်းများဖာထေးခြင်း၊ နံရံများအချော ကိုင်ခြင်းလုပ်ငန်းခွင်သို့လည်းကောင်း ကြည့်ရှုစစ်ဆေးပြီး အရည်အသွေးစံချိန်စံညွန်းပြည့်မီရေး စစ်ဆေး ဆောင်ရွက်သည်။
မန္တလေးတက္ကသိုလ်အတွင်း အကြီးစားပြင်ဆင်ခြင်းလုပ်ငန်းများနှင့် မန္တလေးတက္ကသိုလ် ၅ ထပ်ဆောင် တည်ဆောက်ခြင်းလုပ်ငန်းများကို ၂၀၁၉-၂၀၂၀ ဘဏ္ဍာနှစ် ပြည်ထောင်စုရန်ပုံငွေဖြင့် အကုန်အကျခံ ဆောင်ရွက်ပေးခြင်းဖြစ်ကြောင်း သိရသည်။
မောင်ပြည်သူ(မန္တလေး)
