သဘာဝဓာတ်ငွေ့စျေးနှုန်းများ ကျဆင်းခြင်းကြောင့် မြန်မာနိုင်ငံ၏ပို့ကုန်ကဏ္ဍတွင် ထိခိုက်မှုများဖြစ်ပေါ်မည်

ရန်ကုန်    ဇူလိုင်    ၁၀

သဘာဝဓာတ်ငွေ့စျေးနှုန်များကျဆင်းခြင်းကြောင့် မြန်မာနိုင်ငံ၏ပို့ကုန်ကဏ္ဍတွင် ထိခိုက်မှုများ ဖြစ်ပေါ်မည်ဟု နိုင်ငံတကာငွေကြေးရန်ပုံငွေအဖွဲ့၏ အစီရင်ခံစာတစ်စောင်အတွင်း၌ ဖော်ပြသည်။

ကိုရိုနာဗိုင်းရပ်စ်ကူးစက်ပြန့်ပွားမှုများကြောင့် ကမ္ဘာ့ရေနံစျေးနှုန်းများ သမိုင်းတလျှောက်စံချိန်တင် ကျဆင်းမှုဖြစ်ပေါ်ခဲ့ပြီးနောက်တွင် သဘာဝဓာတ်ငွေ့စျေးနှုန်းများပါ လိုက်ပါကျဆင်းခဲ့ခြင်းဖြစ်သည်။ သဘာဝ ဓာတ်ငွေ့တင်ပို့မှုသည် မြန်မာ့ပို့ကုန်ကဏ္ဍအတွက် အရေးကြီးသည့်အနေအထားတွင်ရှိနေကာ ၂ဝ၁၈-၂ဝ၁၉  ဘဏ္ဍာနှစ်တွင် သဘာဝဓာတ်ငွေ့တင်ပို့မှုတန်ဖိုးသည် မြန်မာ့ပို့ကုန်ကဏ္ဍ၏ တင်ပို့မှုစုစုပေါင်းပမာဏ၏ ရာခိုင်နှုန်း ၄ဝ အထိရှိခဲ့သည်။ 

ထို့အပြင် ၂ဝ၁၈-၂ဝ၁၉ ဘဏ္ဍာနှစ်အတွင်း ၌ ပြည်ပသို့ သဘာဝဓာတ်ငွေ့တင်ပို့မှုမှ ရရှိခဲ့သောဝင်ငွေသည် အစိုးရရရှိခဲ့သော ဝင်ငွေစုစုပေါင်း၏ ရာခိုင်နှုန်း ၂ဝ အထိရှိခဲ့သည်။ သဘာဝဓာတ်ငွေ့စျေနှုန်းများကျဆင်း ခြင်းသည် အစိုးရဝင်ငွေကိုပါ ထိခိုက်စေမည်ဖြစ်သောကြောင့် စီးပွားရေးကဏ္ဍအပေါ် အကျိုး သက်ရောက်မှုများဖြစ်ပေါ်လာနိုင်သည်ဟုလည်း စီးပွားရေးပညာရှင်များက ခန့်မှန်းလျက်ရှိသည်။ 

ပြည်တွင်းမှထွက်ရှိသော သဘာဝ ဓာတ်ငွေ့များကို အိမ်နီးချင်းနိုင်ငံများဖြစ်သည့် တရုတ်နိုင်ငံနှင့် ထိုင်းနိုင်ငံများသို့ ပိုက်လိုင်းများဖြင့် ချိတ်ဆက်ပေးပို့ကာ ရောင်းချနေခြင်းဖြစ်သည်။

ကျော်ဆန်းမြင့်(ပြန်/ဆက်)