အသင်းဖော်ဟောင်း ကက်စ်မဲရိုးကို အယ်နာဆာအသင်းသို့ ပြောင်းရွှေ့ရန် စီရော်နယ်ဒို ကမ်းလှမ်း
ဇွန် ၅
မန်ယူအသင်းနှင့် အနာဂတ် မရေမရာဖြစ်နေသည့် အသင်းဖော် ဟောင်း ကက်စ်မဲရိုးကို အယ်နာဆာအသင်းထံ ပြောင်းရွှေ့ကစားရန် တိုက်စစ်မှူး စီရော်နယ်ဒိုက ကမ်းလှမ်းမှုပြုလုပ်ခဲ့ကြောင်း သိရ သည်။
အသက် ၃၂ နှစ်ရှိ ကက်စ်မဲရိုးသည် ပြီးခဲ့သည့် ၂၀၂၂ ခုနှစ်က ရီးရဲလ်မက်ဒရစ်အသင်းမှ မန်ယူအသင်းသို့ပြောင်းရွှေ့ ကစားခဲ့သူဖြစ်ပြီး အသင်းနှင့် ပထမဆုံး ဘောလုံးရာသီတွင် အကောင်းဆုံး ခြေစွမ်းပြသနိုင်ခဲ့သော်လည်း ယခုနှစ် ဘောလုံး ရာသီတွင် ဒဏ်ရာပြဿနာများကြောင့် ပုံမှန်ခြေစွမ်းပြသနိုင်ရန် ရုန်းကန်ခဲ့ရပြီး ဝေဖန်မှုများနှင့် ရင်ဆိုင်ခဲ့ရသည်။
မန်ယူအသင်း ပူးတွဲပိုင်ရှင် ရက်ကလစ်ဖ်က အသင်းကို အပြောင်းအလဲများစွာ လုပ်ဆောင်ရန် ပြင်ဆင်နေပြီး နွေရာသီ ကစားသမားအပြောင်းအရွှေ့ကာလတွင် အသင်းမှ ကစားသမား အများစုကို ရောင်းချရန် စီစဉ်နေကာ ရောင်းချမည့် ကစားသမား စာရင်းတွင် ကက်စ်မဲရိုးလည်း ပါဝင်လျက်ရှိသည်။
စီရော်နယ်ဒိုနှင့်ကက်စ်မဲရိုးတို့သည် ရီးရဲလ်မက်ဒရစ်နှင့် မန်ယူအသင်းတို့တွင် ကာလရှည် တွဲဖက်ကစားဖူးသူများဖြစ်ပြီး ရင်းနှီးသည့် ဆက်ဆံရေးများရှိကြသည့်အတွက် စီရော်နယ်ဒိုက အယ်နာဆာအသင်း တာဝန်ရှိသူများထံ ကက်စ်မဲရိုးကို ခေါ်ယူပေး ရန် တောင်းဆိုထားသကဲ့သို့ ၎င်းကိုယ်တိုင်ကလည်း ကက်စ်မဲရိုးထံ ဆက်သွယ်ပြီး အသင်းထံ ပြောင်းရွှေ့လာရန် ကမ်းလှမ်းမှုများပြုလုပ် ထားကြောင်း သိရသည်။
သူရိန်
