မူဆယ်(၁၀၅)မိုင်နယ်စပ်ကုန်သွယ်ရေးဇုန်မှ တရုတ်နိုင်ငံသို့ သရက်သီးကားအစီးရေ တစ်ထောင့်ခုနစ်ရာကျော်နှင့် အသီးတန်ချိန်တစ်သောင်းကျော်တင်ပို့ရောင်းချပေးခဲ့
ရန်ကုန် ဇွန် ၂၉
ဇွန်လပထမ(၁၅)ရက်အတွင်းမူဆယ် (၁၀၅) မိုင်နယ်စပ်ကုန်သွယ်ရေးဇုန်မှ တရုတ်နိုင်ငံသို့ ဖရဲ၊ သခွားတင်ပို့မှု မရှိသော်လည်းသရက်သီးကားအစီးရေ တစ်ထောင့်ခုနစ်ရာကျော်နှင့် သရက်သီးတန်ချိန် တစ်သောင်းကျော်တင် ပို့ရောင်းချပေးခဲ့ကြောင်း စီးပွားရေးနှင့်ကူးသန်းရောင်းဝယ်ရေး ဝန်ကြီးဋ္ဌာနသတင်း များအရသိရသည်။ ယခုအချိန်အခါသည်သရက်သီးထွက်ရှိနေချိန်ဖြစ်နေသဖြင့်မူဆယ်နယ် စပ်ကုန်သွယ် ရေးဇုန်မှတစ်ဆင့်တရုတ်နိုင်ငံသို့ သရက်သီးများကို နေ့စဉ်တင်ပို့ရောင်းချပေးလျက်ရှိသည်။ မူဆယ် နယ်စပ်ကုန် သွယ်ရေးဇုန်ဈေးကွက်သတင်းထုတ်ပြန်ချက်များအရ ဇွန်လ(၁)ရက်မှ (၇)ရက်အထိ သရက်သီးကားအစီးရေ (၁၀ဝ၁)စီး၊ တန်ချိန်အားဖြင့် (၆၈၄၈)တန်နှင့်ဇွန်လ(၈)ရက်နေ့မှ(၁၅)ရက်နေ့အတွင်းသရက်သီးကား အစီးရေ(၇၁၇)စီး၊တန်ချိန်အားဖြင့်(၄၉၆၃)တန်၊တင်ပို့ရောင်းချပေးခဲ့ကြောင်းသိရသည်။ ထို့ကြောင့်ဇွန်လ(၁)ရက်မှ (၁၅)ရက်အထိ ဇွန်လ၏ ပထမ(၁၅)ရက်အတွင်း သရက်သီးကားအစီးရေ (၁၇၁၈)စီးနှင့်သရက်သီးတန်ချိန်(၁၁၈၁၁)တန်တင်ပို့ရောင်းချပေးခဲ့သည်။ မူဆယ်နယ်စပ်ကုန်သွယ်ရေးဇုန်၏သရက် သီးဈေးကွက်တွင် သရက်သီးဈေးနှုန်းမှာဇွန်(၇)ရက်မှ(၁၅)ရက်အတွင်း သရက်သီးတစ်တန်လျှင် တရုတ်နိုင်ငံသုံးငွေ(ယွမ်၆၀ဝ၀)မြန်မာကျပ်ငွေ( ၁၁၄၆၀ဝ၀)ကျပ် ပေါက်ဈေးရှိခဲ့ကြောင်းသိရသည်။
ယခုအခါသရက်သီးများကိုတရုတ်နိုင်ငံသို့သာမကဘဲစင်ကာပူနိုင်ငံသို့လည်း တင်ပို့ရောင်းချပေးလျက်ရှိ သည်။ ရှမ်းပြည်နယ်သရက်အစုအဖွဲ့၏သတင်းများအရ ရှမ်းပြည်နယ်ထွက်စိန်တလုံးသရက်သီးများကို ယခုဇွန်လဆန်းမှစတင်ကာတရုတ်နိုင်ငံနှင့်စင်ကာပူနိုင်ငံ သို့တင်ပို့ရောင်းချပေးနေခြင်းဖြစ်သည်။ ရှမ်းပြည်နယ်၊ ရပ်စောက်မြို့နယ်၊မကျီးကုန်းကျေးရွာအုပ်စုကြာအင်းကျေးရွာအနီးတွင်သရက်သီး ပြုပြင်ထုပ်ပိုးရေးစက်ရုံမှ တစ်ဆင့်တင်ပို့ခဲ့ခြင်းဖြစ်သည်။ ဒေသတွင်းသရက်စိုက်တောင်သူများက လာရောက်ရောင်းချပေးနေသည့် စိန်တလုံးသရက်သီးများကို အဆိုပါစက်ရုံမှအရွယ်အစားခွဲခြားထုပ်ပိုးကာ တရုတ်နိုင်ငံနှင့်စင်ကာပူဈေးကွက် သို့ တင်ပို့ရောင်းချပေးနေခြင်းဖြစ်သည်။ အဆိုပါထုပ်ပိုးစက်ရုံမှ သရက်သီးများကိုအလေးချိန်ဂရမ်(၂၅၀)မှဂရမ် (၃၀ဝ) အထိ၊ ဂရမ်( ၃၀ဝ)အထက်မှ(၃၅၀)ဂရမ်အထိ၊ ဂရမ် (၃၅၀)အထက်မှ ဂရမ်( ၄၀ဝ၊)အထိ၊ ဂရမ်( ၄၀ဝ) အထက် စသည်ဖြင့် အဆင့်အတန်းခွဲခြားထုပ်ပိုးကာတင်ပို့ရောင်းချပေးနေခြင်းဖြစ်သည်။ လက်ရှိတွင်သရက်သီးများကို တရုတ်နိုင်ငံသို့တင်ပို့ရောင်းချပေးရာတွင်သစ်သီးကားများ တရုတ်နိုင်ငံ (ဝမ်တိန်)ကွင်းအထိ သွားရောက်ရောင်းချနေသော်လည်း သစ်သီးကားဒရိုင်ဘာများကိုတရုတ်နိုင်ငံဘက်သို့ ဝင်ခွင့်မပြုသဖြင့်တရုတ်ဘက်မှ ရွေးချယ်ထားသော ယာဉ်မောင်းများဖြင့်သာ အဝင်အထွက်ပြုလုပ်နေရကြောင်း သိရသည်။
ကိုသစ္စာလှိုင်
