အလုအယက်ဝယ်ယူမှုများရှိလာ၍ သြစတြေးလျစူပါမားကတ်များတွင် ရေအိမ်သုံးစက္ကူကို အကန့်အသတ်ဖြင့်သာ ရောင်းချ
ဆစ်ဒနီ ဇွန် ၂၇
အလုအယက်ဝယ်ယူမှုများ တစ်ကျော့ပြန် ဖြစ်ပွားလာခြင်းကြောင့် သြစတြေးလျနိုင်ငံမှ စူပါမားကတ်များတွင် ရေအိမ်သုံးစက္ကူကို အကန့်အသတ်ဖြင့်သာ ဝယ်ယူခွင့်ပြုထားသည်။ ပြီးခဲ့သည့်သောကြာနေ့တွင် Coles စူပါမားကတ်က နိုင်ငံတစ်ဝန်းရှိ ဆိုင်ခွဲများတွင် ရေအိမ်သုံးစက္ကူလိပ် တစ်ထုပ်သာ ဝယ်ယူခွင့်ပေးခဲ့ပြီး Woolworths ဆိုင်များတွင် ရေအိမ်သုံးစက္ကူနှစ်လိပ်သာ အများဆုံးဝယ်ယူခွင့်ပေးခဲ့သည်။ ဗစ်တိုးရီးယား ပြည်နယ်တွင် COVID-19 ရောဂါကူးစက်မှု မြင့်တက်ခဲ့ပြီးနောက် အလုအယက်ဝယ်ယူမှုများ ကြုံတွေ့ခဲ့ခြင်း ဖြစ်သည်။
ပြည်သူများအနေဖြင့် အလုအယက်ဝယ်ယူစရာ အကြောင်းမရှိဟု သြစတြေးလျဝန်ကြီးချုပ် မော်ရစ်ဆင်က ပြောသည်။ ပြီးခဲ့သည့်မတ်လကလည်း သြစတြေးလျနိုင်ငံတွင် အလုအယက်ဝယ်ယူမှုများ ဖြစ်ပွားခဲ့ခြင်းကြောင့် အကန့်အသတ်ဖြင့်သာ ဝယ်ယူရန် သတ်မှတ်ခဲ့ဖူးသည်။ ဆစ်ဒနီမြို့ရှိ စတိုးဆိုင်တစ်ဆိုင်တွင် အိမ်သာသုံးစက္ကူ လုဝယ်ရာမှာ ဈေးဝယ်သူအချင်းချင်း ခိုက်ရန်ဖြစ်ပွားခဲ့ခြင်းကြောင့် ရဲခေါ်ခဲ့ရဖူးသည်။
(KNT)
