စနစ်တကျကုသ သောက်သုံးစေချင်

ရန်ကုန်၊ ဇွန် ၂၃

တီဘီရောဂါသည် လေထဲမှတစ်ဆင့် ကူးစက်ပျံ့နှံ့နိုင်သော တီဘီပိုးကြောင့်ဖြစ်သော ကူးစက်ရောဂါတစ်မျိုး ဖြစ်၏။ တီဘီရောဂါသည် အနာသိဆေးရှိပြီးဖြစ်ရာ ဝေဒနာရှင်များ ဆေးကိုစနစ်တကျ သောက်သုံးခြင်းဖြင့် ကုသပျောက်ကင်းနိုင်သည်။

တီဘီဆေးဝါးများကို ကျန်းမာရေးဝန်ထမ်းများ၏ ညွှန်ကြားချက်အတိုင်း စနစ်တကျ  ဆေးကုသကာလ ပြီးဆုံးသည်အထိ မှန်မှန်မကုသလျှင် တီဘီပိုးများက အစွမ်းထက်ဆေးများကိုယဉ်သွားပြီး ကုသရန်ခက်ခဲသည့် ဆေးယဉ်ပါးတီဘီရောဂါ (သို့မဟုတ်) ဆေးမတိုးသော တီဘီရောဂါအဖြစ် ပြောင်းလဲသွားမည်ဖြစ်သည်။

ဆေးယဉ်ပါး တီဘီရောဂါလူနာများကို ပုံမှန်တီဘီဆေးများအပြင် ဆေးယဉ်ပါးတီဘီရောဂါသုံးဆေးများပါ တွဲဖက်၍ ဆေးကုသရာတွင် ဆေးကုသကာလမှာ နှစ်နှစ်ခန့်ကြာမြင့်မည်ဖြစ်သည်။

ဆေးယဉ်ပါးတီဘီရောဂါဖြစ်နိုင်ရန် အခြေအနေရှိသူများမှာ HIV ပိုးကူးစက်ခံနေရသူ၊ သွေးချို၊ ဆီးချို ရောဂါခံစားနေရသူ၊ အရက်စွဲရောဂါရှိသူ၊ တီဘီရောဂါကုသမှုကို စနစ်တကျခံယူရန် အခြေအနေမရှိသူများ ဖြစ်သည်။ 

ဆေးယဉ်ပါးတီဘီရောဂါသည် အခြားသူများကို ကူးစက်ပြန့်ပွားမှုမရှိစေရန် တီဘီလူနာကို ကျန်းမာရေး ဝန်ထမ်းများနှင့် စနစ်တကျ ထိရောက်စွာကုသခြင်း၊ ချောင်းဆိုး၊ စကားပြော၊ နှာချေရာတွင် နှာခေါင်းစည်း တပ်ဆင်၍နေထိုင်ခြင်း၊ သလိပ်ထွေးသောအခါ ပိုးသတ်ဆေးထည့်ထားသော အဖုံးပါခွက်ထဲတွင်သာထွေးပြီး စွန့်ပစ်ရာတွင် တွင်းနက်နက်တူးစွန့်ပစ်ကာ အပေါ်မှမြေကြီးပြန်ဖို့ခြင်း၊ မီးရှို့ခြင်း၊ ရေအိမ်ထဲစွန့်ပစ်ခြင်း၊ လေဝင်လေထွက်ကောင်းရန် ပြတင်းပေါက်များဖွင့်ထားခြင်း၊ မိသားစုနှင့်ခြင်ထောင်တစ်ခုတည်းအတူ မအိပ်ခြင်း၊ မျက်နှာသုတ်ပဝါ၊ လက်သုတ်ပဝါ သီးသန့်သုံးခြင်း၊ လျှော်ပြီး နေရောင်ခြည်နှင့်လှန်းခြင်းတို့ကို ဆောင်ရွက်ရမည်ဖြစ်သည်။

ဆေးယဉ်ပါးတီဘီရောဂါဖြစ်စေသော အကြောင်းအရင်းများတွင် သလိပ်တွင် တီဘီပိုးကင်းစင်အောင် ခြောက်လ (သို့မဟုတ်) ရှစ်လကြာသည်အထိ ဆေးဝါးများကိုမသောက်သုံးဘဲ မိမိသဘောနှင့်ဆေးသောက် ရပ်ခြင်း၊ မဆီလျော်သော ဆေးကုထုံးနှင့်ဆေးကုသခြင်း၊ ဆေးယဉ်ပါးတီဘီရောဂါရှိသူထံမှ တိုက်ရိုက်ကူးစက် ခံရခြင်းတို့ကြောင့်ဖြစ်သည်။ 

ဆေးယဉ်ပါးနေသော တီဘီရောဂါလူနာများကို ကျန်းမာရေးဝန်ထမ်းများက နေ့စဉ်တိုက်ရိုက်ကြည့်ရှု ဆေးတိုက်ကျွေးလျက်ရှိရာ ဝေဒနာရှင်များက အလေးထားလိုက်နာ သောက်သုံးစေချင်ကြောင်း။       ။