လူနာတင်ယာဉ်တစ်စီးအရှိန်မထိန်းနိုင်ဘဲ လမ်းဘေးသစ်ပင်ဝင်တိုက်ကာ ရေမြောင်းအတွင်း ထိုးကျမှုဖြစ်ပွား
မင်းဘူး ဇွန် ၂၀
မကွေးတိုင်းဒေသကြီး၊ မင်းဘူး(စကု)မြို့နယ်တွင် လူနာတင်ယာဉ်တစ်စီး ရှေ့ကားကျော်တက်ရာမှ အရှိန်မထိန်းနိုင်ဘဲ လမ်းဘေးသစ်ပင်ဝင်တိုက်ကာ ရေမြောင်းအတွင်းထိုးကျမှုဖြစ်ပွားခဲ့ကြောင်း မင်းဘူး မြို့မရဲစခန်းမှ သိရသည်။
ဖြစ်စဉ်မှာ ဇွန် ၁၉ ရက် ညနေ ၃နာရီခွဲအချိန်က ငဖဲမြို့နယ်ပြည်သူ့ဆေးရုံမှယာဉ်မောင်း ကျော်နိုင်ထွန်း မောင်းနှင်ပြီး လူနာတစ်ဦးတင်ဆောင်၍ မင်းဘူး-ပဒါန်းကားလမ်းအတိုင်းထွက်ခွာလာရာ ကန်ရေအမှတ်(၃)ကျေးရွာအနီးတွင် ရှေ့မှမောင်းနှင်နေသော ကားတစ်စီးအားကျော်တက်စဉ် အရှိန်မထိန်းနိုင်ဘဲ လမ်းဝဲဘက် ခြမ်းရှိ ထနောင်းပင်အားပွတ်တိုက်မိပြီး အရှိန်လွန်၍လမ်းဘေးရေလွှဲမြောင်းအတွင်းသို့ ထိုးကျကာယာဉ်၏ ရှေ့ခေါင်းပိုင်းပျက်စီးခဲ့ပြီး လူ ၅ ဦးဒဏ်ရာရရှိခဲ့ကြောင်း သိရသည်။
အဆိုပါယာဉ်တိုက်မှုကြောင့် ယာဉ်မောင်းအမျိုးသားတစ်ဦးနှင့် အမျိုးသမီးတစ်ဦး (စိုးရိမ်ရ)ဒဏ်ရာနှင့် ကျန်အမျိုးသားတစ်ဦးနှင့် အမျိုးသမီးနှစ်ဦးတို့မှာ(မစိုးရိမ်ရ) ဒဏ်ရာများ အသီးသီးရရှိခဲ့ပြီး မကွေးတိုင်းဒေသကြီး ပြည်သူ့ဆေးရုံသို့ပို့ဆောင်ကာ ဆေးကုသမှုခံယူလျက်ရှိကြောင်း မင်းဘူးမြို့မရဲစခန်းဒုရဲအုပ်ကျော်ငြိမ်းထံမှသိရှိရသည်။
အဆိုပါဖြစ်စဉ်နှင့်ပတ်သက်၍ ယာဉ်မောင်းကျော်နိုင်ထွန်းအား မင်းဘူးမြို့မရဲစခန်းတွင် အမှုဖွင့်အရေးယူ ဆောင်ရွက်ထားရှိကြောင်း သိရသည်။
မောင်မောင် (မင်းဘူး)
