ပန်းတနော် ဇွန် ၁၇
ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ် ထိန်ကုန်းကျေးရွာတွင် မိသားစုဝင်ငွေတိုးပွား စေရန် တစ်နိုင်တစ်ပိုင် ထိုင်ဝမ် (ငါးပြင်မ)မွေးမြူရေးလုပ်ငန်းလုပ်ကိုင်လျက်ရှိကြောင်း သိရသည်။
"တစ်နိုင်တစ်ပိုင်ငါးမွေးမြူရေးအနေနဲ့ ထိုင်ဝမ်(ငါးပြင်မ)ကို ကျင်ခွက်နဲ့ဝယ်ပြီး မွေးမြူပါတယ်။ မွေးလို့ တစ်လသားပြည့်တဲ့အချိန်မှာ အကြီးအသေးပြန်ခွဲပါတယ်။ ခုဆိုရင် ၂ လနဲ့ ၁၃ ရက်သားရှိပါပြီ။ ငါးကို လေးလလောက်မွေးရတာကြောင့် ငါးစာအနေနဲ့ကတော့ တစ်လကို ငါးအစာ ၅ အိတ်လောက်ကုန်ပါတယ်။
အကျိုးအမြတ်ကတော့ စျေးကွက်ပေါ်မူတည်ပြီးကြည့်ရမှာပါ။ လက်ရှိစျေးကတော့ ဒိုင်စျေးက ၆၅၀၀ ပန်းတနော်စျေးခွဲလက်လီမှာတော့ ၁၂၀၀၀ စျေးရှိပါတယ်" ဟု ထိန်ကုန်းကျေးရွာမှ တစ်နိုင်တစ်ပိုင်ငါးမွေးမြူရေး လုပ်ငန်းလုပ်ကိုင်သူ ဦးနိုင်လှထွန်းကပြောသည်။ ပန်းတနော်မြို့နယ်တွင် လယ်ယာစိုက်ပျိုးရေးလုပ်ငန်းအပြင် တစ်နိုင်တစ်ပိုင်ငါးမွေးမြူရေးလုပ်ငန်းကိုလည်းလုပ်ကိုင်လျက်ရှိကြောင်း သိရသည်။
အေးချမ်းအောင်(ပန်းတနော်)