ရန်ကုန် ဇွန် ၁၇
ရန်ကုန်တိုင်းဒေသကြီး၊ ဗဟန်းမြို့နယ်၊ ဗိုလ်ချုပ်ပြတိုက်လမ်း၊ ဗိုလ်ချို(၁)ရပ်ကွက်ရှိ သက်တမ်း(၉၉)နှစ်ကြာခဲ့ပြီဖြစ်သော ဗိုလ်ချုပ်အောင်ဆန်းနေအိမ်ပြတိုက်(ရန်ကုန်)၏ ပြင်ဆင်ထိန်းသိမ်းမှုများကို ဆောင်ရွက်လျက်ရှိရာ ယခုဇွန်လကုန်ပိုင်းအပြီးဆောင်ရွက်သွားမည်ဖြစ်ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ အမျိုးသားပြတိုက်(ရန်ကုန်)၊ ဗိုလ်ချုပ်အောင်ဆန်းပြတိုက် (ရန်ကုန်)မှ သိရသည်။
လက်ရှိတွင်ဗိုလ်ချုပ်အောင်ဆန်းနေအိမ်ပြတိုက်၏ အဆောက်အအုံအတွင်း/အပြင်ပိုင်းတွင် လိုအပ်သောနေရာများအားဆေးသုတ်ခြင်း၊ အဆောက်အအုံအမိုးများပြင်ဆင်ခြင်း၊ မီးဘေးကြိုတင်ကာကွယ်ရေး အစီအမံများ ဆောင်ရွက်ခြင်း၊ အိမ်အပေါ်/အောက်နှင့်ခြံဝင်းအတွင်းပန်းခြံမြက်ခင်းပြင်တို့အား ပြင်ဆင်ဆောင်ရွက်လျက်ရှိကြောင်းသိရသည်။ လက်ရှိတွင်ကိုဗစ်ကာလဖြစ်ပေါ်နေ၍ ဗိုလ်ချုပ်အောင်ဆန်းနေအိမ်ပြတိုက်ကို မတ်လ ၂၅ ရက် ဧည့်ဝင်ခွင့် ပိတ်ထားပြီး ပြင်ဆင်ထိန်းသိမ်းမှုများကို ရန်ကုန်မြို့ပြ အမွေနှစ်ထိန်းသိမ်းရေးအဖွဲ့(YHT) / မြန်မာနိုင်ငံအင်ဂျင်နီယာကောင်စီနှင်ဌာနဆိုင်ရာတာဝန်ရှိသူများ ပူးပေါင်းစီစဉ်မှုဖြင့် ရှေးမူမပျက်ပြင်ဆင်ထိန်းသိမ်းနိုင်ရန် MIEG မှ ဧပြီလဆန်းပိုင်းတွင် စတင်ဆောင်ရွက်ခြင်း ဖြစ်ကြောင်း သိရသည်။
ယခုပြင်ဆင်ထိန်းသိမ်းနေသော ဗိုလ်ချုပ်အောင်ဆန်းနေအိမ် ပြတိုက်ကြီးသည် ၁၉၂၁ ခုနှစ်တွင် စတင် ဆောက်လုပ်ခဲ့ပြီး နှစ်စဉ်ပြင်ဆင်ထိန်းသိမ်းမှုများေကြာင့် ယနေ့အချိန်ထိနှစ်ပေါင်း ၉၉ နှစ် တိုင်အောင်တည်တံ့ခိုင်မြဲလာခဲ့ပြီဖြစ်သည်။ ထိုပြတိုက်ပြန်လည်ဖွင့်လှစ်မည်ဆိုလျှင် ဗိုလ်ချုပ်အောင်ဆန်းစီးသော ကားနှင့်ကားရုံပြကွက်၊ ခြံဝင်းအတွင်း အောင်ဆန်းလင်း ရေနစ်သေဆုံးခဲ့သော ရေကန်ငယ်နေရာ ပြကွက်၊ အိမ်နောက်ဖေးခြံဝင်းအတွင်း ဗိုလ်ချုပ်အောင်ဆန်းပေါက်တူးကိုင်ကာ သီးပင်စားပင်များစိုက်ပျိုးနေသည့် ပြကွက်၊ အိမ်အတွင်းပိုင်းအောက်ထပ်တွင် ဗိုလ်ချုပ်အောင်ဆန်း၏ဆီလီကွန်ရုပ်တုပြကွက်၊ ပဲပြုတ် နံပြားနှင့် အမှတ်တရ မိသားစု ထမင်းဝိုင်း၊ ဧည့်ခန်း၊ အပေါ်ထပ်တွင် စာကြည့်ခန်း၊ မိသားစုအိပ်ခန်း၊ ကလေးများ အိပ်ခန်း၊ ဘုရားခန်း၊ အထူးအစည်းအဝေးခန်းနှင့့် အခြားဗိုလ်ချုပ်အောင်ဆန်း၏အမှတ်တရအောက်မေ့ဖွယ် ပြခန်းများ/လွတ်လပ်ရေးကြိုးပမ်းမှုသမိုင်းတစ်လျှောက်ဓာတ်ပုံမှတ်တမ်းများနှင့် အသုံးအဆောင်ပစ္စည်းပြကွက်များကို လေ့လာခွင့် ရမည်ဖြစ်သည်။
မင်းခ