ကျိုင်းတုံမြို့နယ်တွင် နိုင်ငံတော်မဟာဓာတ်အားစနစ်မှ လျှပ်စစ်မီးရရှိတော့မည်
ကျိုင်းတုံ ဇွန် ၁၇
ရှမ်းပြည်နယ်(အရှေ့ပိုင်း)၊ ကျိုင်းတုံမြို့တွင် နိုင်ငံတော်ဓာတ်အားစနစ်မှ လျှပ်စစ်မီးရရှိတော့မည်ဖြစ်၍ ပြည်သူများသို့ လျှပ်စစ်ဓာတ်အားဖြန့်ဖြူးခြင်းနှင့် ဝန်ဆောင်မှုပေးခြင်းဆိုင်ရာ လုပ်ငန်းများရှင်းလင်းခြင်းနှင့် လျှပ်စစ်အန္တရာယ်ကင်းရှင်းရေး အသိပညာပေး ရှင်းလင်းခြင်းကို ဇွန် ၁၆ နံနက် ၉ နာရီက မြို့တော်ခန်းမ၌
ပြုလုပ်ခဲ့သည်။
ရှင်းလင်းပွဲတွင် ပြည်နယ်လွှတ်တော်ကိုယ်စားလှယ် ဒေါက်တာဝဏ္ဏစိုးက အမှာစကားပြောကြားပြီး ရှမ်းပြည်နယ် (အရှေ့ပိုင်း)၊ လျှပ်စစ်အင်ဂျင်နီယာမှူး ဦးသက်ပိုင်မျိုးက လျှပ်စစ်ဓာတ်အားဖြန့်ဖြူးခြင်း၊ ဝန်ဆောင်မှုပေးခြင်းဆိုင်ရာများနှင့် လျှပ်စစ်အန္တရယ်ကင်းရှင်းရေးအသိပညာပေးရှင်းလင်းပြောကြားခဲ့သည်။
ရှင်းလင်းပွဲသို့လွှတ်တော်ကိုယ်စားလှယ်များ၊ ပြည်နယ်ဒုတိယအုပ်ချုပ်ရေးမှူးဦးရဲနိုင်၊ ခရိုင်အုပ်ချုပ် ရေးမှူး ဦးဝင်းမင်းသိန်း၊ မြို့မိမြို့ဖများ၊ ဌာနဆိုင်ရာများ၊ နိုင်ငံရေးပါတီများ၊ ဒေသခံပြည်သူများ တက်ရောက်ပြီး မီတာလျှောက်ထားခြင်း၊ ဓာတ်အားခနှုန်းထားများနှင့် သိလိုသည်များမေးမြန်ရာ တာဝန်ရှိ သူများက ရှင်းလင်း ဖြေကြားခဲ့ကြောင်းသိရသည်။
ရှမ်းပြည်နယ်(အရှေ့ပိုင်း)သို့ နိုင်ငံတော်ဓာတ်အားစနစ်ရောက်ရှိပြီဖြစ်၍ မိုင်းပျဉ်းမြို့နယ်တွင် ဇွန်လ ၇ ရက်က လျှပ်စစ်ဓာတ်အားဖြန့်ဖြူးပေးခဲ့ပြီး မကြာမီရက်ပိုင်းအတွင်း ကျိုင်းတုံမြို့နယ်တွင် လျှပ်စစ်ဓာတ်အားဖြန့်ဖြူးပေးနိုင်တော့မည်ဖြစ်ကြောင်း သိရသည်။
အောင်ဇင်မြင့်(ပြန်/ဆက်)
