အရှေ့လေပွေလှိုင်း စစ်တောင်းမြစ်ဝှမ်းဖြတ်ကျော်ကာ ရန်ကုန်မြို့တွင် မိုးအဆက်မပြတ်ရွာသွန်း

ရန်ကုန်၊ ဩဂုတ် ၁၇

မြန်မာနိုင်ငံကို ဝင်ရောက် နေသည့် အရှေ့လေပွေလှိုင်း Upper Air Cyclonic Circulatio (UACC) သည် ယနေ့ နံနက် ၂ နာရီတွင် မော်လမြိုင်မြို့ပေါ်သို့ ရောက်ရှိလာပြီး၊ စစ်တောင်း မြစ်ဝှမ်းကိုဖြတ်ကာ နံနက် ၁၁ နာရီဝန်းကျင်ခန့်တွင် လှည်းကူး မြို့နှင့်ရန်ကုန်မြို့ကြားက ဖြတ် ပြီး ဟင်္သာတမြို့ပေါ်ကတစ်ဆင့် ဩဂုတ် ၁၈ ရက် နံနက်ပိုင်းတွင် သံတွဲမြို့အနီးရှိ ဘင်္ဂလားပင်လယ်အော်အရှေ့အလယ်ပိုင်းပင်လယ်ပြင်ကို ရောက်ရှိမည်ဖြစ်ကြောင်း နောက်ဆုံးရ ECMWF ၏ ကြိုတင် ခန့်မှန်းချက်တွင် သိရသည်။

ယခင်ကြိုတင်ခန့်မှန်းချက် လမ်းကြောင်းများ၏ တောင်ဘက် မိုင်အနည်းငယ်ကို ရောက်ရှိ လာပြီး ဩဂုတ် ၁၉ ရက်တွင် အားကောင်းသည့် လေဖိအားနည်း ရပ်ဝန်းအဆင့်အထိ  အားပို ကောင်းလာနိုင်မည်ဟု ခန့်မှန်း ထားသည်။

UACC ၏  အရှိန်ကြောင့် ရခိုင်ကမ်းရိုးတန်းတစ်လျှောက်၊ ဧရာဝတီမြစ်ဝကျွန်းပေါ်ဒေသ နှင့်ကမ်းရိုးတန်းတစ်လျှောက်၊ မွန်တနင်္သာရီ ကမ်းရိုးတန်း တစ်လျှောက်တွင် ဩဂုတ် ၁၉ ရက်နှင့်၂၀ ရက်အထိ လေပြင်းများ ကျရောက်ပြီး  မိုးသည်းထန်နေ မည်ဖြစ်သည်။

လေပြင်းတိုက်ခတ်ချိန်တွင် တစ်နာရီ ၁၅ မိုင်မှ ၃၅ မိုင်အထိ တိုက်ခတ်နိုင်ပြီး လှိုင်းအမြင့် ၈ ပေမှ ၁၀ ပေအထိရှိနိုင်မည်ဟု ကြိုတင်ခန့်မှန်းထားသည်။

အဆိုပါအရှေ့လေပွေလှိုင်း အရှိန်ကြောင့်  ရန်ကုန်တိုင်း ဒေသကြီးတွင် မိုးအဆက်မပြတ် ရွာသွန်းနေပြီး မြို့နယ်အတော် များများ၌ ယနေ့နံနက်ပိုင်းတွင် ရေပြည့်၊ ရေလျှံမှုများ ဖြစ်ပေါ်  လျက်ရှိသည်။                    CN-015