နိုင်ဂျီးရီးယားနိုင်ငံအရှေ့မြောက်ပိုင်းတွင် ဂျီဟတ်တိုက်ခိုက်မှုကြောင့် အနည်းဆုံးလူ ၅၉ ဦးသေဆုံး

အဘူဂျာ   ဇွန်   ၁၀

နိုင်ဂျီးရီးယားနိုင်ငံအရှေ့မြောက်ပိုင်းတွင် ဂျီဟတ်တိုက်ခိုက်မှုဟုသံသယရှိသည့် ဖြစ်ရပ်ကြောင့် အနည်းဆုံးလူ ၅၉ ဦးအသတ်ခံခဲ့ရသည်။

ပြီးခဲ့သည့်အင်္ဂါနေ့မွန်းလွဲပိုင်းကဘော်နိုပြည်နယ် ဂူဘီယိုခရိုင်ရှိဝေးလံခေါင်သီသည့် ရွာတစ်ရွာကိုသေနတ် သမားများကဝင်ရောက်ပစ်ခတ်ပြီးလူဒါဇင်ပေါင်းများစွာကိုပစ်သတ်ခဲ့သည်။ လက်တုံ့ပြန် တိုက်ခိုက်မှုဟုယုံ ကြည်ရသည့်ဖြစ်ရပ်တွင် ရွာကိုမီးရှို့ခဲ့သည်ဟုဒေသခံမီဒီယာများက ဖော်ပြသည်။

အဆိုပါတိုက်ခိုက်မှုနှင့်ပတ်သက်၍ မည်သည့်အဖွဲ့ကမျှ ယင်းတို့၏ လက်ချက်ဟုထုတ်ဖော်ပြောကြားခြင်း မရှိသေးပေ။ AFP သတင်းဌာနကရုပ်အလောင်း ၅၉ လောင်းတွေ့ရှိခဲ့သည်ဟုဖော်ပြထားပြီး ရိုက်တာသတင်း ဌာနတွင် လူ ၆၉ ဦးအသတ်ခံရသည်ဟုဖော်ပြထားသည်။

ရွာသားများကယင်းတို့အဖွဲ့၏ လှုပ်ရှားမှုများကိုလုံခြုံရေးတပ်ဖွဲ့ထံသတင်းပေးခဲ့သည်ဟုလက်နက်ကိုင် များကသံသယရှိခဲ့သည်ဟုရိုက်တာသတင်းဌာနက ဖော်ပြသည်။

ထို့အပြင် ရွာသားများက ကျွဲ၊ နွား၊ ကြက်၊ ဘဲစသည့် အိမ်မွေးတိရစ္ဆာန်များကိုကာကွယ်ရန် ဂျီဟတ်များကိုသတ်ခဲ့သည်ဟု AFP သတင်းဌာနက ဖော်ပြသည်။

နိုင်ဂျီးရီးယားနိုင်ငံအရှေ့မြောက်ပိုင်းတွင် ဘိုကိုဟာရမ် အကြမ်းဖက်အဖွဲ့နှင့် IS အဖွဲ့လက်အောက်တွင် လှုပ်ရှားနေသည့် အကြမ်းဖက်အဖွဲ့တို့ကတိုက်ခိုက်မှုများပြုလုပ်လေ့ရှိရာယခုတိုက်ခိုက်မှုမှာမည်သည့် အဖွဲ့၏ လက်ချက်ဟုတပ်အပ်ပြောနိုင်ခြင်းမရှိသေးပေ။                                                                            

(KNT)