ချမ်းမြသာစည်မြို့နယ်အတွင်း ဆိုင်ကယ်လုယက်သူများ ဖမ်းဆီးရမိ
မန္တလေး ဇန်နဝါရီ ၁၈
မန္တလေးတိုင်းဒေသကြီး ရဲတပ်ဖွဲ့၏ လမ်းညွှန်ချက်နှင့်အညီ ဆိုင်ကယ်လုယက်မှုများ လျော့နည်းကျဆင်းရေး၊ လုယက်သူများ အမြန်ဆုံးဖမ်းမိရေး ဆောင်ရွက်လျက်ရှိရာ ချမ်းမြသာစည်မြို့နယ် အမှတ် ၁၁ နယ်မြေရဲစခန်းမှ နယ်ထိန်းတပ်ဖွဲ့ဝင်များ၊ ခရိုင်မှုခင်း နှိမ်နှင်းရေး ရဲတပ်ဖွဲ့ဝင်များက ဇန်နဝါရီလဆန်းက ချမ်းမြသာစည် မြို့နယ်အတွင်း လှည့်ကင်းဆောင်ရွက်စဉ် ဓားနှင့်ခုတ်ပြီး ဆိုင်ကယ် များကို လုယက်သူ ၇ ဦးအား လုယူရာတွင်အသုံးပြုသည့်ဓားလက်နက် များနှင့်အတူ ဖမ်းဆီးရမိသည်။
၎င်းတို့လုယူခဲ့သည့် ဆိုင်ကယ်မျိုးစုံ ၁၂ စီးကို သိမ်းဆည်းပြီး ပြစ်မှုကျူးလွန်သူများအား တရားရုံးတင်စစ်ဆေးပြီးချိန်တွင် နစ်နာ သူပိုင်ရှင်အား ဆိုင်ကယ်ပြန်လည်ပေးအပ်မည်ဖြစ်ရာ (ကမ-၃) ယာဉ်မှတ်ပုံတင်စာအုပ်များ ယူဆောင်၍ ချမ်းမြသာစည်မြို့နယ် နယ်မြေရဲစခန်းတွင် ဆိုင်ကယ်များ၏ စက်အမှတ်၊ ဘောက်ချာအမှတ် များ စစ်ဆေးနိုင်ကြောင်း သိရသည်။
မောင်ပြည်သူ(မန္တလေး)
