တာမွေမြို့နယ် အထူးကုဆေးခန်းများနှင့် ဓာတ်ခွဲခန်းများ ကွင်းဆင်းစစ်ဆေး

ရန်ကုန်    နိုဝင်ဘာ  ၂၈

ရန်ကုန်တိုင်းဒေသကြီး၊ အရှေ့ပိုင်းခရိုင် တာမွေမြို့နယ်တွင် မြို့နယ်စီမံအုပ်ချုပ်ရေး အဖွဲ့၏ဦးဆောင်မှုဖြင့် မြို့နယ်ပြည်သူ့ ကျန်းမာရေးဦးစီးဌာနနှင့် မြို့နယ်စည်ပင် သာယာရေးကော်မတီက တာဝန်ရှိသူများ  ပါဝင်သောပူးပေါင်းအဖွဲ့သည် ယမန်နေ့ နံနက်ပိုင်းက မြို့နယ်အတွင်း ဖွင့်လှစ် ထားရှိသော အထူးကုဆေးခန်းများနှင့် ဓာတ်ခွဲခန်းများကို ကျန်းမာရေးဝန်ကြီး ဌာနတွင် တရားဝင်မှတ်ပုံတင်ထားခြင်း ရှိ/မရှိနှင့် တရားဝင်မှတ်ပုံတင်ထားပါ ကလည်း ကိုဗစ်-၁၉ရောဂါ ကြိုတင် ကာကွယ်ရေး လမ်းညွှန်ချက်များနှင့်အညီ ဖွင့်လှစ်ထားခြင်း ရှိ/မရှိ ကို ကွင်းဆင်း ကြည့်ရှုစစ်ဆေးကြသည်။

ထိုသို့ ကွင်းဆင်းကြည့်ရှုစစ်ဆေးစဉ် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ  မြို့နယ် အုပ်ချုပ်ရေးမှူး ဦးကိုးအောင်က မြို့နယ် အတွင်းရှိ အထူးကုဆေးခန်းများနှင့် ဓာတ်ခွဲခန်းများအနေဖြင့် လူတန်းစား မရွေး လာရောက်ပြသနိုင်ရေးအတွက် သင့်တင့် မျှတသော ဆေးကုသမှုစရိတ်များဖြင့် ကောင်းမွန်သော ကျန်းမာရေးဝန်ဆောင်မှု များပေးစေလိုကြောင်း၊ ကိုဗစ်-၁၉ ကာလ အတွင်း ဆေးကုသမှုများဆောင်ရွက် ပေးရာတွင် ကျန်းမာရေးဝန်ကြီးဌာနက ထုတ်ပြန်ထားသည့် လမ်းညွှန်ချက်များနှင့် အညီ ဖွင့်လှစ်ကုသပေးစေလိုကြောင်း၊ လာရောက်ပြသသည့် ပြည်သူများကို ကိုဗစ်-၁၉ ရောဂါအသိပညာပေးလုပ်ငန်း များကို စဉ်ဆက်မပြတ်အရှိန်အဟုန်မြှင့် ဆောင်ရွက်ပေးခြင်းဖြင့် ကြိုတင်ကာကွယ် ထိန်းချုပ်ရေးလုပ်ငန်းများတွင် ပူးပေါင်း ပါဝင် ဆောင်ရွက်ပေးကြစေလိုကြောင်း” မှာကြားပြီး မြို့နယ်အတွင်းရှိ အထူးကု ဆေးခန်းများနှင့် ဓာတ်ခွဲခန်းများကို ကွင်းဆင်းစစ်ဆေးကာ လိုအပ်သည်များကို ပူးပေါင်းညှိနှိုင်းဆောင်ရွက်ပေးသည်။

 နိုင်လင်းအောင်(ပြန်/ဆက်)