၁၂ နှစ်အရွယ်အမျိုးသမီးငယ်ကို ခိုးပြေးရာမှ လွတ်မြောက်လာ
ရန်ကုန် မေ ၂၈
ဒလမြို့၊ ကမာကဆစ်ရပ်ကွက် မဉ္ဇူစိမ်းလမ်း၊ နေအိမ်ဘေးချင်းကပ်နေထိုင်သူ အိမ်ထောင်သည်အမျိုး သားတစ်ဦးက အသက်(၁၂)နှစ်ကျော်အရွယ်ရှိ အမျိုးသမီးငယ်ကို သားမယားအဖြစ်ပေါင်းသင်းရန်ခိုးပြေး မည်ဟုဆိုကာ လက်ကိုဆွဲလျက်အတင်းအဓမ္မခေါ်ဆောင်ခဲ့သဖြင့် အမျိုးသမီးငယ်၏မိခင်မှ အမှုဖွင့်တိုင်တန်းခြင်းအတွက် အရေးယူဆောင်ရွက်ထားရှိကြောင်း မေ ၂၇ ရက်က ဒလမြို့မရဲတပ်ဖွဲ့စခန်းမှသိရသည်။
ဖြစ်စဉ်မှာ မေ ၂၆ ရက်၊ ည ၁၀ နာရီခန့်က၊ ကမာကဆစ်ရပ်ကွက် မဉ္ဇူစိမ်းလမ်းနေ မိခင်ဖြစ်သူ ဒေါ်------- မှ သမီးဖြစ်သူမ -------- ကို ရပ်ကွက်အတွင်း အကြွေးသွားပေးခိုင်းရာမှ နေအိမ်သို့ပြန်လည်ရောက်ရှိ လာခြင်းမရှိသဖြင့် လိုက်လံရှာဖွေနေခဲ့ရာမှ ည ၁၁ နာရီခွဲခန့်တွင် သမီးဖြစ်သူမ ------ မှာ နေအိမ်သို့ပြန်လည်ရောက်ရှိလာ၍ မေးမြန်းကြည့်ရာ ရပ်ကွက်အတွင်းအကြွေးပေးပြီးနေအိမ်သို့အပြန် လမ်းထိပ်အရောက်၌ နေအိမ်ဘေးချင်းကပ်နေထိုင်သူ တင်မျိုးဝင်း(၂၇)နှစ်(ဘ)ဦးသံချောင်းနှင့်တွေ့ရှိရာမှ ယင်းက မ------ ကို သားမယားအဖြစ်ပေါင်းသင်းလိုကြောင်းနှင့် ခိုးပြေးမည်ဟုပြောဆိုကာ လက်ကိုဆွဲ၍ အတင်းအဓမ္မခေါ်ဆောင်သွားခဲ့ကြောင်း၊ မှော်စက်ရပ်ကွက်ဘုရားလေးစိမ်းလမ်းအရောက် မ----- က အတင်း ရုန်းကန်ပြီး နေအိမ်သို့ပြန်ပြေးလာခဲ့ရကြောင်း တင်မျိုးဝင်းသည် မေ ၁၆ ရက်၊ ည ၁၁ နာရီခန့်ကလည်း ယင်း၏ခယ်မတော်သူနှင့်အတူ အဖော်အဖြစ်စောင့်အိပ်ပေးရန် အကူအညီတောင်းသဖြင့် ခယ်မဖြစ်သူနှင့် အတူ တင်မျိုးဝင်းနေအိမ်၌ ညစောင့်အိပ်ပေးစဉ် သမီးဖြစ်သူမ------ ကို သားမယားပြုကျင့်ရန်ဘောင်းဘီ ကို အတင်းဆွဲချွတ်ခဲ့သဖြင့် အတင်းရုန်းကန်ပြီး အော်မည်ပြုရာ တင်မျိုးဝင်းကအခြားသူများသိအောင် ပြောပြပါက သတ်မည်ဟုကြိမ်းမောင်းပြောဆိုခဲ့ဖူးကြောင်း မိခင်ဖြစ်သူကိုပြောပြသိရသဖြင့် မိခင်ဒေါ်------- က တင်မျိုးဝင်းဆိုသူကို အရေးယူပေးပါရန် တိုင်တန်းမှုအပေါ် ဒလမြို့မရဲတပ်ဖွဲ့စခန်းမှ (ပ)၁၀၈၂/၂၀၂၀ ရာဇသတ်ကြီးပုဒ်မ ၃၇၆/၅၁၁/၃၆၃/၅၀၆ ဖြင့် အမှုဖွင့်အရေးယူစစ်ဆေးဆောင်ရွက်လျက်ရှိကြောင်းသိရသည်။
အံ့ကြီးမောင်(ဒလ)
