ရန်ကုန် မေ ၂၇
မြန်မာအမျိုးသားလေကြောင်း(MNA) နှင့် စင်ကာပူနိုင်ငံရှိ မြန်မာသံရုံးတို့ ပူးပေါင်းစီစဉ်ဆောင်ရွက်မှုဖြင့် ယခု ကိုရိုနာဗိုင်းရပ်စ်ရောဂါ COVID-19 ကူးစက်ကာလအတွင်း ဆဋ္ဌမအကြိမ်မြောက် စင်ကာပူ-ရန်ကုန် ကယ်ဆယ်ရေးလေယာဉ်ခရီးစဉ် (Relief Flight) ကို မေ ၃၁ ရက်တွင် ထပ်မံပြေးဆွဲပေးသွားမည်ဖြစ်ကြောင်း သိရသည်။
နေရပ်သို့ပြန်လိုကြသော စင်ကာပူနိုင်ငံရောက် မြန်မာနိုင်ငံသားများ အဆင်ပြေစေရန်အတွက် မြန်မာ အမျိုးသားလေကြောင်း(MNA) အနေနှင့် စင်ကာပူ-ရန်ကုန် ကယ်ဆယ်ရေးလေယာဉ်ခရီးစဉ်များကို မေ ၇ ရက်၊ ၉ ရက်၊ ၁၃ ရက်၊ ၁၆ ရက်နှင့် ၂၁ ရက်တို့တွင် အသီးသီးပြေးဆွဲပေးခဲ့ပြီး ယခုထပ်မံ၍ ဆဋ္ဌမအကြိမ်မြောက် စင်ကာပူ-ရန်ကုန် ကယ်ဆယ်ရေးလေယာဉ်ခရီးစဉ်ကိုလည်း မေ ၃၁ ရက်တွင် ပျံသန်းပြေးဆွဲပေးရန် စီစဉ် ဆောင် ရွက်ခြင်းဖြစ်သည်။
အဆိုပါ ဆဋ္ဌမအကြိမ်မြောက် စင်ကာပူ-ရန်ကုန် ကယ်ဆယ်ရေး လေယာဉ်ခရီးစဉ်(Relief Flight)ကို ပြေးဆွဲရာတွင် မေ ၃၁ ရက်၊ ညနေ ၃ နာရီ ၁၅ မိနစ်တွင် စင်ကာပူနိုင်ငံမှ စတင်ထွက်ခွာမည်ဖြစ်ပြီး ရန်ကုန် အပြည်ပြည်ဆိုင်ရာလေဆိပ်သို့ ညနေ ၄ နာရီ ၄၅ မိနစ်တွင် ရောက်ရှိမည်ဖြစ်ကြောင်း သိရသည်။
ယင်း Relief Flight ခရီးစဉ်တွင် သက်ဆိုင်ရာအာဏာပိုင်များက စစ်ဆေးဆောင်ရွက်ပြီး ခွင့်ပြုသူများကိုသာ ကန့်သတ်ထားသော ခရီးသည်အရေအတွက်အတိုင်း လိုက်ပါစီးနင်းခွင့်ပြုမည်ဖြစ်ကြောင်း၊ လေယာဉ်လက်မှတ် ဝယ်ယူလိုသူများနှင့် အသေးစိတ်အချက်အလက်များ သိရှိလိုသူများသည် ဖုန်းနံပါတ် 81990528 နှင့် 98273447 တို့ကို ဆက်သွယ်စုံစမ်းနိုင်ကြောင်း သိရသည်။
(ဆောင်းဦး)