ရန်ကုန် မေ ၂၇
ရန်ကုန်တိုင်းဒေသကြီးအတွင်းရှိ ကျေးလက်ဒေသများ လျှပ်စစ်မီးရရှိရန် နိုင်ငံတော်၏ လမ်းညွှန်မှုနှင့် တိုင်းဒေသကြီးအစိုးရအဖွဲ့၏ ဦးဆောင်မှုဖြင့် ဆောင်ရွက်လျက်ရှိရာ တိုက်ကြီးမြို့နယ် ဥက္ကံ-တဘူးလှဆည် ကျေးလက်ဖွံ့ဖြိုးရေးလမ်းတစ်လျှောက်တွင် မီးတိုင်များကို စိုက်ထူလျက်ရှိ၍ ယခုနှစ် ဒီဇင်ဘာလမတိုင်မီ ကျေးရွာပေါင်း ၃၄ ရွာ လျှပ်စစ်မီးရရှိမည်ဖြစ်ကြောင်း တိုက်ကြီးမြို့နယ် ရန်ကုန်လျှပ်စစ်ဓာတ်အားပေးရေးကော်ပို ရေးရှင်းမှသိရသည်။
တိုက်ကြီးမြို့နယ်အတွင်း ၂၀၁၉-၂၀၂၀ ပြည့်နှစ်တွင် ကျေးရွာပေါင်း ၃၄ ရွာနှင့် ၂၀၂၀-၂၀၂၁ ပြည့်နှစ်တွင် ကျေးရွာပေါင်း ၄၆ ရွာ လျှပ်စစ်မီးရရှိရန် အကောင်အထည်ဖော်ဆောင်ရွက်လျက်ရှိပြီး ခရိုင်ချင်းဆက်လမ်းကို ဖြတ်သန်းထားသည့် ဥက္ကံ-တဘူးလှဆည် ကျေးလက်လမ်းတစ်လျှောက်ရှိ ကျေးရွာများလျှပ်စစ်မီးရရှိရန် ဥက္ကံ သကြားစက်ရှိ ဂုံညင်းတန်းကျေးရွာမှ ၉ မိုင် ၆ ဖာလုံရှိ ချောင်းစောက်ကျေးရွာထိ ကားလမ်းဘေးတစ်လျှောက် ဓာတ်တိုင်များကို စိုက်ထူပြီးစီးလျက်ရှိရာ တဘူးလှဆည်အခြေထိ ဆက်လက်စိုက်ထူလျက်ရှိသည်။
“တိုင်းဒေသကြီးအစိုးရအဖွဲ့ လမ်းညွှန်မှုနဲ့ဆောင်ရွက်နေတဲ့ ကျေးရွာမီးလင်းရေး ဆောင်ရွက်ချက်မှာ တိုက်ကြီးမြို့နယ်က ကျေးရွာပေါင်း ၈၀ လည်း ပါဝင်ပါတယ်။ ဒီနှစ် ဒီဇင်ဘာလကုန်မှာ ဥက္ကံ-တဘူးလှဆည် ကျေးလက်လမ်းပိုင်းတစ်လျှောက် ကျေးရွာတွေအပါအဝင် ကျေးရွာ ၃၄ ရွာ လျှပ်စစ်မီးရရှိပါပြီ။ လာမယ့် ဘတ်ဂျက်နှစ်မှာလည်း ကျေးရွာ ၄၆ ရွာ မီးလင်းရေးကို တိုက်ကြီးသီးသန့်အဖြစ် ဆက်လက်ဆောင်ရွက်သွား မှာပါ။ လုပ်ငန်းမြန်ဆန်ဖို့အတွက် ကျေးလက်တွေမှာ မီးတိုင်တွေစိုက်တဲ့အခါမှာ ကျေးလက်ပြည်သူတွေ ပူးပေါင်းကူညီမှုဟာလည်း အထူးအရေးပါပါတယ်”ဟု တိုက်ကြီးမြို့နယ် လျှပ်စစ်အင်ဂျင်နီယာ(မန်နေဂျာ) ဦးအောင်ကျော်မြင့်က ပြောသည်။
(၁၁၂)